मिस मगर नेपालकाे फाइनलमा यी ११ सुन्दरी, काे-काे हुन् ?

पोखरा । सातौँ संस्करणको मिस मगर नेपाल-२०२४ का लागि ११ जना फाइनल चरणमा प्रवेश गरेका छन् । प्रतियाेगितामा २० जना सुन्दरीले प्रतिस्पर्धा गरेका थिए ।

टिम संयोजक प्रियंका गर्बुजा मगरका अनुसार फाइनल चरणमा रामेछापकी दिपिका आले मगर, कृष्टिना पुन मगर र सरिता थापामगर, म्याग्दीकी आशिका गर्बुजा मगर र नरिशा पुन मगर, बागलुङकी अनुजा पुन मगर, स्याङ्जाकी माया दर्लामी मगर, महोत्तरीकी रश्मी आले मगर र जानकी राजकोटी मगर, रोल्पाकी अस्मिता बुढा मगर र काठमाडौँकी जेरुशा सारु मगर प्रवेश गरेका छन् ।

हाल फाइनल प्रवेश गरेका प्रतिस्पर्धीलाई विभिन्न तालिम प्रदान गरिरहेको छ । जसमा मगर मातृभाषा, कला, संस्कृति बारे प्रशिक्षण भइरहेको छ ।

कार्यक्रम संयोजक तथा नेपाल आदिवासी जनजाति पत्रकार महासंघ (फोनिज) गण्डकीका अध्यक्ष रुद्र श्रीसमगरले प्रतियोगीलाई भाषा, कला र संस्कृतिको प्रशिक्षण दिइरहेका छन् ।

प्रतियोगीलाई मातृभाषाको तालिमसँगै नेतृत्व विकास, भेषभूषा, कला र संस्कृतिलगायतका तालिम प्रदान गरिएको छ ।

एसटी क्रियसन म्यानेजमेन्टद्वारा आयोजित मिस मगर नेपालको सातौं संस्करणको ग्राण्ड फिनाले भदौ २२ गते पोखरामा हुनेछ ।