भीषण बाढीले एक दर्जन बढी घर बगायाे, सात जनाको उद्धार, अझै केही बेपत्ता

सोलुखुम्बु । सोलुखुम्बुको खुम्बु पासाङल्हामु गाउँपालिका वडा नं. ५ थामेमा आएको भीषण बाढीले एक दर्जन बढी घर बगाएको छ । साथै विद्यालय र क्लिनिकमासमेत क्षति पुगेको बताइएको छ ।

बाढीमा फसेका सात जनाको उद्धार गरिएको र केही बेपत्ता भएका छन् । थामे खोलामा एक्कासि बढेको बहावले उक्त क्षति भएको प्रहरीले जनाएको छ । प्रहरीले केही बेपत्ता भएको हुन सक्ने शंका गरिएको छ ।

सुरक्षा निकायले उद्दारको काम जारी राखेको छ । स्थानीय प्रशासनले थामे खोलाको शिरमा रहेका हिमताल फुटेर या कुनै पहाड खसेर बाढी आएको हुन सक्ने जनाएको छ ।

थामेमा बाढी पसेको हुनाले उक्त क्षेत्रका सात वटा घर अझै जोखिमपूर्ण अवस्थामा छन् । सञ्चार र विद्युत् सेवा प्रभावित भएकाले यकिन विवरण आउन सकेको छैन ।