स्याङ्जाको मिर्मीबाट सालका अवैध काठ बरामद

स्याङ्जा । जिल्ला प्रहरी कार्यालय स्याङ्जाले सालका अवैध काठ नियन्त्रणमा लिएको छ ।

बिहीबार राति ८ः३० बजे प्रहरी चौकी बिर्घाबाट खटिएको टोलीले कालिगण्डकी गाउँपालिका वडा नं. ७ मिर्मीस्थित आँधीमुहान भित्री सडक खण्डबाट सो काठ नियन्त्रणमा लिइएको प्रहरी निरीक्षक उमेशलाल श्रेष्ठले जानकारी दिए ।

रूखापानीबाट मिर्मीतर्फ आउँदै गरेको लु४त ६५६५ नम्बरको ट्याक्टर चेकजाँच गर्नेक्रममा सालको चिरान काठ थान सात थान, १५ दशमलव ६ क्यू फिट फेला पारी ट्याक्टरसहित नियन्त्रणमा लिइएको श्रेष्ठले बताए ।

काठ र ट्याक्टरसहित चालकलाई आवश्यक कारवाहीका लागि शुक्रबार सवडिभिजन वन कार्यालय गल्याङमा बुझाइएको प्रहरीले जनाएको छ ।