एमाले मोडमा सवारी दुर्घटना, सर्केगाड गाउँपालिकाका उपाध्यक्ष कार्कीको निधन

सुर्खेत । सुर्खेतमा सोमबार सवारी दुर्घटना हुँदा हुम्लाको सर्केगाड गाउँपालिकाका उपाध्यक्ष चन्द्रसिंह कार्की (मुक्ति)को निधन भएको छ ।

दुर्घटनामा गम्भीर घाइते भएका कार्कीको उपचारका क्रममा भेरी अस्पतालमा निधन भएको जिल्ला प्रहरी कार्यालय सुर्खेतले जनाएको छ ।

जिल्ला प्रहरी कार्यालयका प्रहरी नायव उपरीक्षक (डीएसपी) वीरेन्द्रवीर विश्वकर्माका अनुसार सोमबार दिउँसो सुर्खेतबाट नेपालगञ्ज जाँदै गरेको कर्णाली प्रदेश ०२००१ ख १०११ नम्बरको फोर्स गाडी भेरीगंगा नगरपालिका-५ एमाले मोडमा दुर्घटनामा परेको हो ।

सो दुर्घटनामा २१ जना घाइते भएका थिए । घाइते सबैको भेरी अस्पतालमा उपचार भइरहेको छ ।

गाउँपालिका उपाध्यक्ष कार्की कर्णाली प्रदेश सभा सदस्य जुम्कित लामाका श्रीमान् हुन् । कार्की नेकपा माओवादी केन्द्रको प्रदेश समिति सचिवालय सदस्य हुन् ।