पोखरास्थित क्लब क्याटवाकको दोस्रो वार्षिकोत्सव

पोखरा । क्लब क्याटवाकले दोस्रो वार्षिकोत्सवमा निःशुल्क आँखा चेकअप शिविर, रक्तदानलगायतका कार्यक्रम आयोजना गरेको छ ।

पोखरा-६ लेकसाइडमा गरिएको निःशुल्क आँखा परीक्षणबाट एक सय २१ जनाले सेवा लिए । यस्तै रक्तदानमा ६९ युनिट रगत संकलन भएको क्लबका सञ्चालक गुप्त लामाले जानकारी दिए ।

क्लबले यस अघि पनि विद्याश्रममा खाद्यान्न वितरण, सरकारी विद्यालयका गरिब तथा जेहेन्दार विद्यार्थीलाई पोसाक, झोला तथा स्टेशनरी वितरण, भूकम्प पीडितलाई आर्थिक सहयोगलगायतका कार्यक्रम गर्दै आएको सञ्चालक अमृत पहारीले बताए ।

सञ्चालनदेखि नै क्लब क्याटवाक युवा पुस्तामा निकै रोजाइमा परिरहेको छ । क्लबले वार्षिकोत्सवकै अवसरमा कन्दरा ब्याण्डको विशेष सांगीतिक कार्यक्रमसमेत गरेको थियो ।

जसमा तीन हजार बढी दर्शक कन्दरा ब्याण्डका गायक विवेक श्रेष्ठको गीतमा रमाएका थिए ।