रोटरी क्लब अफ पोखरा अन्नपूर्णद्वारा शैक्षिक तथा खेलकुद सामाग्री सहयोग

पोखरा । रोटरी क्लब अफ पोखरा अन्नपूर्णले पोखरा महानगरपालिका वडा नं. १६ घुरकुनास्थित जनता आधारभूत विद्यालयमा शैक्षिक तथा खेलकुद सामाग्री वितरण गरेको छ । शैक्षिक सामाग्रीमा विद्यार्थीका लागि झोला, कपि, कलम तथा खेलकुदका सामाग्री छन् ।

वडाध्यक्ष अमृत शर्मा तिमिल्सिनाको उपस्थितिमा शैक्षिक सामाग्री हस्तान्तरण गरिएको कार्यक्रम संयोजक विजयराज आचार्यले जानकारी दिए ।

सो अवसरमा वडाध्यक्ष तिमिल्सिनाले आफ्नो वडाको विद्यालयमा सहयोग गरेर अन्नपूर्ण रोटरीले शैक्षिक क्षेत्रमा महत्वपूर्ण योगदान दिएको बताए । उनले यस्ता कार्यक्रम आगामी दिनमा पनि निरन्तर रुपमा अघि बढाउन सुझाव दिए ।

विद्यालय व्यवस्थापन समिति अध्यक्ष श्रीकृष्ण आचार्यले रोटरीद्वारा प्रदान गरिएको सहयोग विद्यार्थीका लागि महत्वपूर्ण हुने बताए ।

क्लबका पूर्वअध्यक्षद्वय माधवप्रसाद सिग्देल र तेजनाथ न्यौपानेले अन्नपूर्ण रोटरीले विगतका वर्षमा पनि यस्तै रचनात्मक कार्य थुप्रै गर्दै आएको बताए ।

क्लब अध्यक्ष भानुभक्त भण्डारी क्षितिजको अध्यक्षतामा भएको कार्यक्रमा स्वागत कार्यक्रम संयोजक आचार्यले र सञ्चालन सचिव सन्तोष भण्डारीले गरेका थिए ।

कार्यक्रममा माया तिमिल्सिना र राजेश गौतमले रोटरीको सामाजिक कार्यको प्रशंसा गरेका थिए ।

कार्यक्रममा क्लबका पदाधिकारी सरोज बराल, प्रेम भुजेल, सदस्य नवीन बराल, माधव बराल, कृष्णहरि पौडेलका साथै विद्यालय व्यवस्थापन समिति सदस्य र अभिभावक सहभागी थिए ।

कार्यक्रमका लागि रोट्र्याक क्लब अन्नपूर्णले पनि सहयोग गरेको थियो ।