भारतमा नेपाली तीर्थयात्री सवार बस दुर्घटना, ४३ यात्रु रहेको अनुमान

पोखरा । नेपालमा भारतीय तीर्थयात्री सवार बस दुर्घटनाको घटना सेलाउन नपाउँदै भारतमा नेपाली तीर्थयात्री सवार बस दुर्घटनामा परेको छ ।

भारतको बिहार राज्यको समस्तीपुरमा आज बिहानै भएको दुर्घटनामा कम्तीमा २५ जना यात्रु घाइते भएको बताइएको छ । दुर्घटनाग्रस्त बसमा ४३ यात्रु रहेको अनुमान गरिएको छ ।

बारा जिल्लाको बारागढी गाउँपालिकाका अध्यक्ष अशोककुमार जैलसवालका अनुसार सोही गाउँपालिकाको वडा नं. ३ मूर्तिपालियाबाट बोलबम तीर्थयात्राका लागि गएको बस दुर्घटनामा परेको हो ।

भारतीय सञ्चारमाध्यमका अनुसार ना७ख ६४४६ नम्बरको बस समस्तीपुरस्थित मुसरीघरारी थाना क्षेत्रमा पर्ने एनएच २८ राजमार्गमा दुर्घटना भएको आफूले जानकारी पाएकाे अध्यक्ष जैसवालले बताए ।

नेपाली तीर्थयात्री सवार बसलाई एउटा ट्रकले ठक्कर दिँदा बसको एक्सल भाँचिएर सडकमै पल्टिएको बताइएको छ ।

घाइतेलाई नजिकैको अस्पतालमा उपचारका लागि भर्ना गरिएको भारतीय सञ्चारमाध्यम आजतकले समाचारमा उल्लेख गरेको छ ।