पोखरास्थित विन्ध्यवासिनी माविको ७८औँ स्थापना दिवसमा दीप प्रज्ज्वलन

पोखरा । पोखरा महानगरपालिका वडा नं १६ बाटुलेचौरस्थित विन्ध्यवासिनी माध्यमिक विद्यालयले ७८औँ स्थापना दिवस मनाएको छ ।

स्थापना दिवसको अवसरमा विद्यालय प्रांगणमा ७८ वटा दीप प्रज्ज्वलन तथा शुभकामना आदानप्रदान गरिएको छ ।

विद्यालय व्यवस्थापन समितिका ज्येष्ठ सदस्य गुरूदत्त भट्टराई, प्रधानाध्यापक कृष्णप्रसाद आचार्य, सदस्य सन्दीप थापा, शिक्षक, कर्मचारी तथा विद्यार्थीको सहभागितामा दीप प्रज्ज्वलन गरिएको हो ।

वडाध्यक्ष अमृत शर्मा तिमिल्सिनाले विन्ध्यवासिनी स्कुलको चर्चा देशभर चुलिँदो रहँदा गर्वले छाति चौडा भएको बताए ।

सो अवसरमा ज्येष्ठ सदस्य भट्टराईले शैक्षिक क्षेत्रमा विद्यालयले महत्वपूर्ण उपलब्धि हासिल गरेको भन्दै खुशी प्रकट गरे ।

प्रधानाध्यापक आचार्यले सबै पक्षको समवन्य र मेहनतबाट विद्यालय गर्विलो इतिहास बनाउन सफल भएको बताए ।