भाजपा गठबन्धनलाई राज्यसभामा बहुमत

काठमाडौँ । भारतको राज्यसभाका लागि भएको निर्वाचनपछि भारतीय जनता पार्टी भाजपा नेतृत्वको राष्ट्रिय लोकतान्त्रिक गठबन्धन (एनडीए) ले १२ नयाँ सदस्यसँग राज्यसभामा बहुमत प्राप्त गरेको छ ।

माथिल्लो सदनमा सबैभन्दा ठूलो दल भाजपाका ९६ सांसद छन् भने सहयोगी छ मनोनित सदस्य र दुई स्वतन्त्र सदस्यसहित एनडीएसँग अब एक सय १९ सदस्यसहित बहुमतमा आएको छ ।

हाल राज्यसभामा कुल दुई सय ३७ सांसद छन् । यसरी बहुमतको संख्या एक सय १९ हो । यी तथ्याङ्क अप्रिल २०२६ सम्म रहनेछन्, जब १० राज्यमा ३१ सीटमा चुनाव हुनेछ ।

नरेन्द्र मोदी सरकारको पछिल्लो १० वर्षमा माथिल्लो सदनमा स्पष्ट बहुमत नहुँदा पनि कुनै विधेयक रोकिएको छैन । वाईएसआर कांग्रेस पार्टी र बिजु जनता दल, जो सधैं सत्ताधारी र विपक्षी गुटबाट अलग रहन्छन्, प्रायः सरकारी बिलको समर्थन गर्दै आएका छन् ।

तर, २०२४ को आमनिर्वाचनपछि दुवै दल प्रतिपक्षको नजिक पुगेका छन् । अर्कोतर्फ कांग्रेस कम सदस्यका कारण विपक्षी दलको नेताको हैसियत गुमाउने नजिक पुगेको छ । हाल कांग्रेसका २६ सदस्य छन् । पूर्ण शक्ति सदनमा प्रतिपक्षी दलको नेताको पद पाउन पार्टीसँग कम्तीमा २५ सांसद हुनुपर्नेछ ।

राज्यसभाको अर्को चुनाव नोभेम्बरमा हुनेछ, जब उत्तर प्रदेश र उत्तराखण्डका ११ जना सदस्य अवकाश लिनेछन् । जसमध्ये १० जना भाजपाका र १ जना समाजवादी पार्टीका हुनेछन् ।