युवा व्यवसायी तथा सहारा क्लब अष्ट्रेलियाका अध्यक्ष थकालीको अल्पायूमै निधन

पोखरा । युवा व्यवसायी, सञ्चार उद्यमी तथा सहारा क्लब अष्ट्रेलियाका अध्यक्ष राजमान थकालीको अल्पायूमै निधन भएको छ ।

थकालीको ५० वर्षको उमेरमा शनिबार साँझ अष्ट्रेलियामै निधन भएको हो । उनी लामो समयदेखि फोक्सोको समस्याबाट पीडित भए ।

थकाली लामो समयदेखि अष्ट्रेलियामै बसोबास गर्दै आएका थिए । उनका श्रीमती र दुई छोरा छन् ।

उनीद्वारा पोखरामा मुग्लान रेष्टुरेष्ट र हिमाअस कन्सल्टेन्सी सञ्चालनमा छ । यस्तै मुग्लानकै नाममा अष्ट्रेलियामा डिपार्टमेन्टल स्टोर्स, रेष्टुरेन्टलगायतका व्यवसाय सञ्चालनमा छ ।

सञ्चार क्षेत्रमा समेत लगानी गरेका उनी गण्डकी भ्वाइस मिडिया ग्रुपद्वारा प्रकाशित गण्डकी भ्वाइस डटकमका संस्थापक संरक्षक हुन् ।

पोखरास्थित सहारा क्लबले अष्ट्रेलियामा बिस्तार गरेको शाखामा उनी संस्थापक अध्यक्ष भएर काम गरेका थिए । उनको मूल थातथालाे मुस्ताङ हो । उनको घर पोखरा-८ नागढुंगामा समेत छ ।

यसैबीच थकालीको निधनप्रति विभिन्न क्षेत्रका व्यक्तित्वले दुःख व्यक्त गरेका छन् ।

सहारा यूकेका अध्यक्ष कृष्ण गुरुङ, सहारा हङकङका अध्यक्ष दीपक गुरुङ, सहारा क्लब पोखराका अध्यक्ष केशवराज बराल, सञ्चार उद्यमी एवं पोखरास्थित क्लाउड नाइन रेष्टुरेन्टका प्रबन्ध निर्देशक महेश्वर सिंह भण्डारी, गण्डकी भ्वाइस डटकमका प्रवन्ध निर्देशक सुरज थापालगायतले थकालीको निधनप्रति दुःख व्यक्त गर्दै भावपूर्ण श्रद्धाञ्जली अर्पण गरेका छन् ।