पोखरामा समता सांगीतिक कार्यक्रमको शतक श्रृङ्खला, कन्दरा ब्यान्डले तताउने

पोखरा । पोखरेली युवा सांस्कृतिक परिवारको आयोजनामा प्रत्येक दुई महिनाको दोस्रो शनिबार गरिँदै आएको समता सांगीतिक कार्यक्रमको १००औँ श्रृङ्खला पोखरामा हुँदैछ । कार्यक्रम भदौ २८ गते शुक्रबार हुनेछ ।

शतक श्रृङ्खलामा कन्दरा ब्यान्डले गीत तथा, संगीत प्रस्तुत गर्नेछ । परिवारका संगीत संयोजक एमडी काफ्लेका अनुसार कार्यक्रममा धर्मराज थापा, अरुण थापा, सरोज गोपाल बज्राचार्य, विनोद गौचनको सम्झनामा रामभक्त जोजिजु, विनोद बानिया, इतु जोजिजु, रजनी ऋदम राई, सन्तोष बस्यालको प्रस्तुति रहनेछ ।

अग्रजको सम्मान र समता सांगीतिकको शतक श्रृङ्खला विशेष गर्न लागिएको संस्थाका अध्यक्ष उपेन्द्र पौडेलले बताए । सबै गीत, संगीत प्रेमीलाई कार्यक्रममा निःशुल्क प्रवेशको व्यवस्था गरिएको उनले बताए ।

कार्यक्रमका लागि पोखरा महानगरपालिका प्रवर्द्धक, सहआयोजकमा सामाजिक विकास तथा युवा खेलकुद मन्त्रालय गण्डकी प्रदेश, गण्डकी प्रज्ञा प्रतिष्ठान तथा सुजल डेरीको सहयोग रहेको छ ।

पोयुसाप ‘साहित्य, कला र संगीतको उत्थान, हाम्रो प्रण’ भन्ने मूल नारा साथ पोखरामा झण्डै पाँच दशकदेखि तीन वटै विधामा क्रियाशील छ ।