जीप दुर्घटनामा पोखराका सागर आचार्यसहित पाँच जना घाइते

सल्यान । पूर्वाधार विकास कार्यालय सल्यानको बोलेरो जीप आज साँझ दुर्घटना हुँदा पाँच जना घाइते भएका छन् । घाइते हुनेमा पोखरा महानगरपालिका-१७ का २७ वर्षीय सागर आचार्यसहित पाँच जना छन् ।

अन्य घाइते हुनेमा दैलेख चामुण्डा बिन्द्रासैनी नगरपालिका वडा नं. १ पाल्तडाँडाका ३० वर्षीय भरतप्रसाद शर्मा, २२ वर्षीया कविता सिजापती, डोटी दिपायल सिलगढी नगरपालिका-१ का २२ वर्षीया मनमोहन सिंह खड्का र पर्सा विरगंज-१३ की २१ वर्षीया पुनम शर्मा रहेको जिल्ला प्रहरी कार्यालय सल्यानले जनाएको छ ।

घाइते सबैको सल्यान जिल्ला अस्पतालमा उपचार भइरहेको जिल्ला प्रहरी कार्यालय सल्यानका सूचना अधिकारी प्रहरी निरीक्षक रेशम बहादुर खत्रीले जानकारी दिए । घाइते सबैको अवस्था मध्यम रहेको उनले बताए ।

बिहीबार साँझ श्रीनगरबाट खलंगा जाँदै गरेको क.प्र०२००२ झ ००३५ नम्बरको बोलेरो शारदा नगरपालिका २ मैसेपानीमा दुर्घटनामा परेको थियो ।

बोलेरो अनियन्त्रित भई सडकबाट करिब ५० मिटर तल खसेको छ । फिल्डबाट फर्कने क्रममा बोलेरो दुर्घटना भएको प्रहरीको भनाइ छ ।