दुर्गा प्रसाईंद्वारा भोलि देशभर चक्काजामको घोषणा

पोखरा । दुर्गा प्रसाईं नेतृत्वको नागरिक बचाउ महाअभियानले असोज ४ गते देशभर चक्काजाम गर्ने भएको छ । पक्राउ पुर्जी जारी भएको विरोधमा चक्काजामको चक्काजामको घोषणा गरिएको हो ।

प्रसाईंलाई विद्युतीय कारोबारअन्तर्गत पक्राउ गर्न काठमाडौँ जिल्ला अदालतले बुधबार अनुमति दिएको थियो ।

त्यसको विरोधमा महाअभियानले बिहीबार विज्ञप्ति जारी गर्दै पक्राउ पुर्जी तत्काल फिर्ता नलिए बिहीबार राँके जुलुस र विरोध प्रदर्शन गर्ने तथा ४ गते चक्काजाम गर्ने चेतावनी दिएको हो ।

महाअभियानले राष्ट्र, राष्ट्रियता, धर्म संस्कृति र नागरिकको जीवन रक्षार्थ शान्तिपूर्ण रूपमा चालिएको आन्दोलनलाई दमन गर्दै गणतन्त्रको उपहास हुने गरी नागरिकको अभिब्यक्ति स्वतन्त्रता र प्रेस स्वतन्त्रताको हननमा सरकार लागेको आरोप लगाएको छ ।

साथै महाअभियानले प्रसाईँका साथै सञ्चारकर्मी प्रकाशचन्द्र दाहाल र जीवन पाण्डेमाथि कपोकल्पित र झुटा मुद्दा लगाएर पक्राउ पुर्जी जारी गरी राज्यले दमन कार्यनीति अपनाएको जनाएको छ ।

‘सो नीति सरकारले तत्काल फिर्ता नलिए आज मिति २०८१ साल असोज ३ गते देशैभर विरोधसभा, राँके जुलुस, विरोध प्रदर्शन र असोज ४ गतेबाट देशैभर चक्काजाम, विरोध सभा, धर्नालगायतका कार्यक्रम अघि बढाउनु हुन सबै नगर, जिल्ला,अञ्चल तथा केन्द्रीय पदाधिकारीज्युहरुलाई यसै विज्ञप्तिमार्फत हार्दिक आह्वान गर्दछौँ’, महाअभियानको विज्ञप्तिमा भनिएको छ ।