पूर्व डीआईजी जोशीलाई पोखरा ल्याइयाे

पाेखरा । सूर्यदर्शन ऋण तथा बचत सहकारी ठगीको कसूरमा पक्राउ परेका नेपाल प्रहरीका पूर्वप्रहरी नायब महानिरीक्षक(डीआईजी) एवं गोरखा मिडिया नेटवर्कका पूर्वसञ्चालक छविलाल जोशीलाई पोखरा ल्याइएको छ ।

उनलाई आइतबार राति ८ बजे बुद्ध एयरमार्फत काठमाडौंबाट पोखरा ल्याइएको हो ।

जोशीलाई काठमाडौँमा पक्राउ गरेर आज पोखरा ल्याइएको जिल्ला प्रहरी कार्यालय कास्कीले जनाएकाे छ ।

उनलाई सोमबार जिल्ला अदालतमा पेस गरिने प्रहरीले जनाएकाे छ ।

जिल्ला प्रहरी कार्यालय कास्कीले सहकारी ठगी प्रकरणमा अनुसन्धानका लागि लेखेको पत्रसमेतका आधारमा उनलाई पक्राउ गरिएको थियाे ।

गृहमन्त्री रमेश लेखकले आइतबार नै प्रहरी प्रशासनलाई सहकारी छानबिन समितिले दिएको प्रतिवेदन कार्यान्वयनका लागि निर्देशन दिएका थिए ।

लेखकले निर्देशन गरेको केही घण्टामै जोशी पक्राउ परेका थिए ।