अर्घाखाँची-पोखरा सम्पर्क समाजद्वारा न्यानो कपडा वितरण

पोखरा । अर्घाखाँची-पोखरा सम्पर्क समाजले पोखरा महानगरपालिका वडा नं. १२ ढिकालेथरस्थित सरस्वती आधारभूत विद्यालयमा अध्ययनरत विद्यार्थीलाई न्यानो कपडा वितरण गरेको छ ।

समाजको १९औँ वार्षिकोत्सवको अवसर पारेर विद्यालयमा अध्ययनरत अतिविपन्न वर्गका विद्यार्थीलाई उक्त सहयोग गरिएको कार्यक्रम संयोजक बाबुलाल पाण्डेले जानकारी दिए ।

कार्यक्रममा विद्यालय व्यवस्थापन समिति अध्यक्ष बलबहादुर कार्कीले विद्यालयमा अध्ययनरत विद्यार्थीलाई सहयोग गरेकोमा समाजप्रति आभार प्रकट गरे ।

कार्यक्रममा पशु स्वास्थ्य अन्वेषण कार्यलयका प्रमुख डा. किरण पाण्डे, पोखरा स्वास्थ्य विज्ञान प्रतिष्ठानका डा.शिशिर क्षेत्री, समाजका सल्लाहकार गुणानिधि पाण्डे, पोखरा विश्वविद्यालयका प्राडा बलराम भट्टराई, पत्रकार परशुराम शर्मा, पर्यटन व्यवसायी पार्वती पाण्डे, विद्यालयका प्रधानाध्यापक रुद्र रानाभाटलगायत सहभागी थिए ।