राष्ट्रिय लोक तथा दोहोरी गीत प्रतिष्ठानको २४औँ साधारणसभा पोखरामा

पोखरा । राष्ट्रिय लोक तथा दोहोरी गीत प्रतिष्ठान नेपालको २४औँ साधारणसभा तथा विधान अधिवेशन पोखरामा हुँदैछ ।

भोलि शुक्रबार र पर्सी शनिबार पोखरास्थित पोखरा सभागृह हलमा कार्यक्रम हुनेछ । कार्यक्रम उद्घाटन गण्डकी प्रदेशका मुख्यमन्त्री सुरेन्द्रराज पाण्डेले गर्नेछन् ।

कार्यक्रमका लागि तयारी अन्तिम चरणमा पुगेको बताइएको छ । कार्यक्रमका लागि राष्ट्रिय लोक तथा दोहोरी गीत प्रतिष्ठान नेपाल गण्डकी प्रदेश सहआयोजक र कास्की शाखाले व्यवस्थापनको जिम्मेवारी पाएको छ । केन्द्रीय समितिका केही पदाधिकारी तथा सदस्य पोखरा आइपुगेर तयारीमा जुटिसकेका छन् ।

प्रतिष्ठानको केन्द्रीय समितिको अन्तिम तयारी बैठक आजै पोखरामा बस्दैछ ।

विधान अधिवेशनले प्रतिष्ठानको विधान थप मजबुत बनाउने विश्वास व्यक्त गरिएको छ । कार्यक्रममा देशभरबाट करिब छ सय जना प्रतिनिधि सहभागी हुने आयोजकको अनुमान छ ।

प्रतिष्ठानकी अध्यक्ष रीता थापा मगरले साधारणसभा र विधान अधिवेशन प्रतिष्ठान र नेपाली लोक सङ्गीतको विकासका निम्ति अर्थपूर्ण बन्ने विश्वास लिएकी छन् ।

उनले भनिन्, साधारणसभाका लागि पोखराबासीलगायत स्वदेश तथा विदेशमा रहने लोक तथा दोहोरी सङ्गीत प्रेमी आमाबुबा, दाजुभाइ तथा दिदिबहिनीको साथ, सहयोग, सल्लाह, सुझाव एवं शुभेच्छा प्राप्त हुनेछ ।’