काठमाडौंबाट पोखरा आउँदै गरेको माइक्रोबस दुर्घटना, १२ जना घाइते

पोखरा । काठमाडौँबाट नुवाकोट हुँदै पोखरा आउँदै गरेको माइक्रोबस दुर्घटना हुँदा १२ जना घाइते भएका छन् ।

माइक्रोबसमा १८ यात्रु सवार रहेकामा १२ जना घाइते भएको प्रहरीले जनाएको छ । घाइतेलाई उपचारका लागि काठमाडौँ पठाइएको छ ।

धादिङको विभिन्न स्थानमा पहिरो गएका कारण सो माइक्रोबस काठमाडौँको टोखाबाट नुवाकोट हुँदै धादिङको गल्छी निस्केर पोखरा आउने क्रममा नुवाकोटमा दुर्घटनामा परेको हो ।

जिल्लाको छहरे-टोखा सडकखण्डअन्तर्गत नुवाकोटको शिवपुरी गाउँपालिका-७ मा ग१ख ४५३५ नम्बरको माइक्रोबस दुर्घटनामा परेको हो ।

बस सडकबाट ५० मिटर तल खसेको प्रहरी नायव उपरीक्षक तिलक भारतीले जानकारी दिए ।

माइक्रोबस भीरमा मौवाको रुखमा अड्किएका कारण ठूलो क्षति हुनबाट जोगिएको डीएसपी भारतीले बताए ।