दुई मोटरसाइकल एकापसमा ठोक्किएर दुर्घटना, दुवै चालकको मृत्यु

कैलाली । मोटरसाइकल दुर्घटना हुँदा कैलालीमा गएराति दुईजनाको ज्यान गएको छ ।

पूर्वपश्चिम राजमार्गअन्तर्गत गौरीगङ्गा नगरपालिका-१ गोप्कामा से६प ६२७९ र बा९५प ९२५२ नम्बरको मोटरसाइकल एकापसमा ठोक्किँदा दुवै जना चालकको मृत्यु भएको प्रहरीले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक (डीएसपी) कबिन्द्रसिंह बोहोराले उक्त दुर्घटनामा जानकी-८ का २० वर्षीय निर्मल चौधरी र कञ्चनपुरको शुक्लाफाँटा-७ का २६ वर्षीय चिरञ्जीवी मल्लको मृत्यु भएको बताए ।

दुर्घटनामा गम्भीर घाइते भएका चौधरी र मल्ललाई उपचारका लागि राति नै धनगढीको नवजीवन अस्पताल पुर्याइएकामा चिकित्सकले मृत घोषणा गरेको प्रहरीले जनाएको छ ।

यस्तै बा९५प ९२५२ नम्बरको मोटरसाइकल पछाडि सवार शुक्लाफाँटा-७ का २२ वर्षीया दीपक बोहोरा घाइते भएका छन् ।

उनको सोही अस्पतालमा उपचार भइरहेको प्रहरीले जनाएको छ ।