नेपालमा फेरि मौसम बदली सुरु, गण्डकीसहित चार प्रदेशमा वर्षा हुने

पोखरा । आजदेखि कोशी प्रदेशबाट फेरि बदली सुरु भएको छ । अहिले कोशीमा बादलले ढाकिसकेको र त्यसको असर कोशीसहित मधेश प्रदेश, बागमती र गण्डकीसम्म देखिने जल तथा मौसम विज्ञान विभाग मौसम पूर्वानुमान महाशाखाले जनाइएको छ ।

बादल लाग्ने र हल्कादेखि मध्यम वर्षा हुने छ । विशेषगरी कोशी प्रदेशमा हल्का र मध्यम वर्षा हुनेछ भने मधेश, बागमती र गण्डकी प्रदेशसम्मै फैलिने छ ।
सुदूरपश्चिम, कर्णाली र लुम्बिनीमा कम नै छ । यो असर भोलि र पर्सीसम्मै रहने जनाइएको छ । तर ठूलो अनि लगातारको वर्षा भने नहुने बताइन्छ ।

तर यसअघिको वर्षाले देशका सबै भूभाग गलेको हुँदा थोरै पानी पर्दा पनि बाढीपहिरोको सम्भावना रहेको जनाइएको छ ।

हाल देशभर मनसुनी वायुको प्रभाव कायमै छ । भारतको मध्य प्रदेश र आसपास क्षेत्रमा रहेको न्यून चापीय प्रणालीको आंशिक प्रभाव नेपालमा रहेको महाशाखाले जनाएको छ ।

आज राति कोशीलगायत देशको पहाडी भूभागमा आंशिकदेखि साधारणतया बदली हुने छ र हल्कादेखि मध्यम वर्षा पनि हुने जनाइएको छ ।

असोज १६ गते कोशी, मधेश प्रदेश र बागमती र गण्डकी प्रदेशमा बदली भई हल्कादेखि मध्यम वर्षा हुने छ ।

असोज १७ गते पनि सोही अवस्था रहेको विभागले जनाएको छ । कोशी प्रदेशका एक दुई स्थानमा भारी वर्षाको सम्भावना पनि रहेको विभागले सार्वजनिक गरेको बुलेटिनमा जनाइएको छ ।