पोखरा महानगरपालिकाद्वारा १०६ वर्षीया बसुन्धरा र १०३ वर्षीय देवीदत्त सम्मानित

पोखरा । अन्तर्राष्ट्रिय ज्येष्ठ नागरिक दिवसको अवसरमा पोखरा महानगरपालिकाले दुई ज्येष्ठ नागरिकलाई सम्मान गरेको छ ।

महानगरले १०६ वर्षीय बसुन्धरा बराल र १०३ वर्षीय देवीदत्त तिवारीलाई सम्मान गरेको हो । दुबै जनालाई उनीहरुकै घरमा पुगेर सम्मान गरेको गरिएको बताइएको छ ।

पोखरा-१३ काहुुँखोलाकी बराललाई महानगरकी कार्यबाहक प्रमुख मञ्जुदेवी गुरुङ र पोखरा-१३ का वडाध्यक्ष किरण बरालले १४ हजार रुपैयाँ नगद, सम्मानपत्र, माला र दोसल्ला ओढाएर सम्मान गरेका हुन् ।

यस्तै पोखरा-३१ का वडाध्यक्ष ढकनाथ कंडेलले ज्येष्ठ नागरिक पिताका रुपमा नगद, माला र दोसल्ला ओढाएर सम्मान गरे ।

महानगरले प्रत्येक वर्ष ज्येष्ठ नागरिकमध्ये दुई जनालाई सम्मान गर्र्दै आएको छ । महानगरले अन्तर्राष्ट्रिय ज्येष्ठ नागरिक दिवसको अवसमार प्रत्येक वर्ष नगर पिता र नगर आमाको रुपमा सम्मान गर्दै आएको छ ।

उपप्रमुख गुरुङले ज्येष्ठ नागरिकलाई माया, सद्भाव र सम्मान व्यक्त गर्नुपर्ने बताइन् । ज्येष्ठ नागरिकलाई परिवारका सदस्यले कुनै दुःख कष्ट नदिई पालनपोषण गर्नुपर्नेमा जोड दिँदै नेपालको संविधानले ज्येष्ठ नागरिकको संरक्षणका बारेमा स्पष्ट व्यवस्था गरेको बताइन् ।

पोखरा महानगरले पनि ज्येष्ठ नागरिकको क्षेत्रमा विभिन्न कार्यक्रम सञ्चालन गरिरहेको बताइन् ।

वडाध्यक्ष किरण बरालले आफ्नै वडाको ज्येष्ठ नागरिकलाई सम्मान पाउनु सुखद् भएको बाउँदै सम्मानित व्यक्तित्वको सुस्वास्थ्य र दीर्घायूको कामना गरे ।

कार्यक्रममा महानगरका सामाजिक विकास महाशाखाका अधिकृत मञ्जु ढुंगाना, महिला विकास अधिकृत बेलकुमारी गुरुङलगायतले बोलेका थिए ।