नेपालद्वारा क्यानडा सामू १४० रनको चुनौती पेस

पोखरा । क्यानडामा जारी त्रिकोणात्मक टि-ट्वान्टी सिरिजअन्तर्गत तेस्रो खेलमा नेपाललले घरेलु टोली क्यानडा सामु खेलमा नेपालले १४० रनको चुनौती पेस गरेको छ ।

टस हारेर पहिला ब्याटिङ गरेको नेपालले २० ओभर खेलर ६ विकेट गुमाएर १३९ रन बनाउन सफल भएको हो ।

खेलमा ओपनर अनिल साहले ३० बलमा ४ चौका र ३ छक्कासहित सर्वाधिक ४१ रन बनाए । आसिफ शेख ३० बलमा ३ चौका र १ छक्कासहित ३० रन जोडे ।

नेपाललाई ओपनर आसिफ र अनिलले ९.१ ओभरमा ७० रनको साझेदारी गर्दै राम्रो सुरुवात दिलाएका थिए । हर्ष ठाकेरको बलमा ठूलो सट खेलेका अनिल अखिल कुमारबाट क्याच आउट भएपछि मध्यक्रमका ब्याटरले राम्रो गर्न सकेनन् ।

कुशल भुर्तेलले १३, दीपेन्द्रसिंह ऐरी १२, रोहित पौडेल र कुशल मल्ल ४-४ रन बनाए । गुल्सन झा १६ बलमा २ छक्कासहित २३ र करण केसी ८ रनमा नट आउट रहे ।

क्यानडाका हर्ष ठाकेरले ४ ओभरमा १७ रन खर्चेर २ विकेट लिए । प्रविन कुमार, डिलोन हेलिगर र साद बिन जाफरले १-१ विकेट लिए ।

अबको केही बेरमा क्यानडाले ब्याटिङ गर्नेछ । यस सिरजको पहिलो खेलमा नेपाल क्यानडासँग १४ रनले पराजित भएको थियो । यस खेलमा नेपाललाई त्यस हारको बदला लिने मौका छ ।

नेपालको प्लेइङ एघारमा कप्तान रोहित पौडेलसँगै आसिफ शेख, कुशल भुर्तेल, अनिल शाह, कुशल मल्ल, दीपेन्द्रसिंह ऐरी, गुलशन झा, करण केसी, सोमपाल कामी, सन्दीप लामिछाने र ललित राजवंशी छन ।