पहिरो खसेपछि धादिङको थोपलखोला थुनियो, तटीय क्षेत्रमा त्रास

धादिङ । धादिङ पहिरो खसेर धादिङको सिद्धलेक गाउँपालिका वडा नं ४ र ६ को सिमानामा पर्ने थोपलखोला थुनिएको छ ।

थोपलखोलाको ज्यामिरे रह नजिकै शनिबार राति सुख्खा पहिरो खसेपछि खोला थुनिन पुगेको हो ।

पहिरोले खोला थुनिएपछि ज्यामिरे रह क्षेत्रमा ताल निर्माण भएको छ । खोला थुनिएर ताल निर्माण भएको हेर्न आइतबार बिहानैदेखि मानिसको भिड लागेको थियो ।

पहिरोले थुनिएको भागमा पानी भरिएर एक छेउबाट बग्न थालेको भए पनि पहिरो हटाउन नसकिने भएकाले ताल कायमै रहेको स्थानीयले बताएका छन् ।

पहिरोले खोला थुनिएको खबर आएपछि सिद्धलेक गाउँपालिका अध्यक्ष परशुराम खतिवडाले आइतबार दिउँसो घटनास्थल पुगेर पहिरोको अवलोकन गरेर फर्किएका छन् ।

खोला थुनिएको तटीय क्षेत्रमा मानव बस्ती नभएकोले मानवीय क्षतिको सम्भावना कम रहे पनि पानीको सतह बढ्दै जाँदा खेतीबालीमा भने क्षति पुग्ने अवस्था छ ।

खोला थुनिनेक्रम बढ्दै जाने हो भने थोपलखोला हाइड्रोपावरको विद्युत उत्पादन केन्द्रमा भने क्षति हुन सक्ने भन्दै कर्मचारी त्रासमा छन् ।

खोला थुनिएको ठाउँ थोपलखोला हाइड्रोपावरको विद्युत गृहभन्दा केही तल छ ।