संकल्प सहकारीको १५औँ साधारणसभा

पोखरा । पोखरा महानगरपालिका वडा नं ७ मासबारस्थित संकल्प बचत तथा ऋण सहकारी संस्था लिमिटेडको १५औँ साधारणसभा सम्पन्न भएको छ ।

साधारणसभा उद्घाटन गर्दै पोखरा-७ का वडाध्यक्ष राममोहन आचार्यले सहकारीका सात सिद्धान्तबाट विचलित नहुन आग्रह गरे ।

अहिलेको परिस्थितिमा आफूलाई जोखिमरहित ढंगले सहकारी सञ्चालन भएको भन्दै शेयर सदस्यले सहकारीबाटै कारोबार गरेर संस्थालाई मजवुत बनाउनुपर्नेमा उनले जोड दिए ।

महिला विकासका लागि आमा समूहका अध्यक्ष तुलसी बरालले सबै शेयर सदस्यले बचत मात्र नभएर सहकारीमार्फत नै आफ्नो घरायसी एवं व्यवसायिक खर्च गर्ने हो भने मुनाफा वृद्वि हुने बताइन् ।

संस्थाका सल्लाहकार सरोज नारायण बरालले शेयर सदस्य जति सक्रिय र चलायमान हुन्छन् उति नै मुनाफा हुने बताए ।

सभामा बचत तथा ऋणतर्फ उत्कृष्ट कारोबार गर्ने टिका कुमारी शर्मा र रामनाथ पौडेललाई सम्मान गरिएको थियो ।

सो अवसरमा कोषाध्यक्षको प्रतिवेदन हरिप्रसाद बराल र लेखा समिति प्रतिवेदन सूर्यनाथ भट्टराईले प्रस्तुत गरेका थिए ।

संस्थाका अध्यक्ष पीताम्बर बरालको अध्यक्षतामा भएको कार्यक्रममा उपाध्यक्ष सावित्री बराल, सहकारी सिद्धान्त वाचन सदस्य अञ्जु आचार्य र सञ्चालन सचिव नरेशप्रसाद बरालले गरेका थिए ।

सहकारीमा हाल दुई सय २० शेयर सदस्य छन् । संस्थाको कुल शेयर पुँजी दुई करोड आठ लाख एक हजार छ सय रहेको छ ।