रेडक्रस सोसाइटी पोखरा-३३ को रक्तदान, ६४ युनिट रगत संकलन

पोखरा । नेपाल रेडक्रस सोसाइटी पोखरा-३३ उपशाखा भरतपोखरीले आयोजना गरेको रक्तदान कार्यक्रममा ६४ युनिट रगत संकलन भएको छ ।

कार्यक्रम उद्घाटन गर्दै पोखरा महानगरपालिका वडा नं. ३३ का वडाअध्यक्ष रामचन्द्र अधिकारीले रक्तदान जत्तिको पवित्र कार्य अन्य नभएको बताए ।

उपशाखाका सभापति टुकराज भण्डारीले शाखाका गतिविधिसँगै डेँगी रोग नियन्त्रण सम्बन्धमा सचेत गराएका थिए ।

नेपाल रेडक्रस सोसाइटी कास्की सभापति डण्डराज शर्मा पौडेलका अनुसार सम्भव भएसम्म सबै उपशाखा र विभिन्न संघसंस्थालाई रक्तदान कार्यक्रम आयोजना गर्न भनिएको छ ।

कास्कीमा हरेक वर्ष ४० हजार युनिट रगत आवश्यक पर्ने सभापति शर्माको भनाइ छ ।

प्रादेशिक रक्तसञ्चार केन्द्र कास्कीका प्रमुख अर्जुन ज्ञवालीले पछिल्लो समय रक्तदानको महत्व बढ्दा नयाँ रक्तदातामा समेत उत्साह थपिएको बताए । उनले विपद्का समयमा मानवीय सेवामा जुट्न आह्वानसमेत गरे ।