एनपीएलको अभ्यास : पोखरा एभेन्जर्सले विराटनगर किंग्सलाई हरायो

पोखरा । नेपाल प्रिमियर लिग (एनपीएल) को तयारीमा रहेको पोखरा एभेन्जर्सले विराटनगर किंग्सलाई ३६ रनले हराएको छ । बिहीबार मूलपानी क्रिकेट मैदानमा भएको अभ्यास खेलमा पोखराले विराटनगर हराएको हो ।

टस जितेर पहिले ब्याटिङ गरेको पोखराले निर्धारित २० ओभरमा ८ विकेट गुमाएर १ सय ६० रन बनाएको थियो ।

पोखराका लागि मार्की खेलाडी कुशल भुर्तेलले सर्वाधिक ५५ रन बनाए । यस्तै माइकल लिस्कले २१ रन बनाउँदा किरण ठगुन्नाले १० रन बनाए ।

विराटनगरका लागि सन्दीप लामिछाने र सुवास भण्डारीले २-२ विकेट लिँदा जितेन्द्र मुखिया, प्रतिश जिसी र राजेश पुलामीले समान १-१ विकेट लिए ।

पोखराले दिएको १ सय ६१ रनको लक्ष्य पछ्याएको विराटनगर पूरै ओभर खेलेर ८ विकेटको क्षतिमा १ सय २४ रन मात्र बनाउन सक्यो ।

विराटनगरका लागि फिर्दोस अन्सारी २१ रनमा अवीजित रहँदा दिपक बोहराले १९ रन तथा बसिर अहमदले १८ रन बनाए ।

पोखराका लागि सागर ढकाल र तीर्थ राज दासले २-२ विकेट लिए ।

बुधबारको अभ्यास खेलमा जनकपुरले लुम्बिनीलाई ९६ रनले हराएको थियो ।

एनपीएल उद्घाटन शनिबार हुँदैछ । उद्घाटन खेलमा विराटनगर र जनकपुर बोल्ट्स भिड्दैछन् ।