पोखरा । लायन्स क्लब इन्टरनेशनल डिष्ट्रिक्ट ३२५ आइ नेपालको तेस्रो क्याविनेट मिटिङ पर्वतको कुश्मामा हुने भएको छ ।
यही मंसिर २८ र २९ गते हुने क्याविनेट मिटिङको तयारी तीव्र बनाइएको डिष्ट्रिक्ट एक्जुकेटिभ टंकराज अधिकारीले जानकारी दिए ।
दुई दिनसम्म चल्ने बैठकले पर्वतको संस्थागत क्षमता सुदृढीकरण, सामाजिक सेवाका क्षेत्रमा सकारात्मक सन्देश प्रवाह, व्यापार व्यवसायमा गतिशीलता, पर्यटन प्रवर्द्धन तथा समग्र जिल्लाको प्रचारप्रसार हुने अपेक्षा गरिएको छ । कार्यक्रमले थोरै व्यापारी व्यवसायीले राहतको अनुभूति गर्ने अपेक्षा गरिएकाे छ ।
ग्रामिण पर्यटन, होमस्टे पर्यटन, कृषि पर्यटन, पर्यापर्यटन, धार्मिक, ऐतिहासिक तथा सांस्कृतिक पर्यटन, साहसिक पर्यटन जस्ता पर्यटकीय क्षेत्रको धेरै सम्भावना भएकाले पर्वतको प्रचारप्रसार र समग्र पर्यटन क्षेत्रको प्रवर्द्धनमा टेवा पुग्ने अपेक्षा गरिएको छ ।
मूल आयोजक समिति संयोजक एवं डिष्ट्रिक्ट को-अर्डिनेटर अर्जुन पौडेल ‘निर्जन’का अनुसार क्याविनेट मिटिङ सभ्य र भव्यरूपमा सम्पन्न सबै प्रकारको तयारी गरिएको छ ।
उनका अनुसार तयारीअन्तर्गत काठमाडौँ क्षेत्र लमजुङ र गोरखाका सदस्यलाई निमन्त्रणा गरिसकिएको छ । उनले पोखरा क्षेत्रका लायन्स नेताहरुलाई निमन्त्रणा गरिएको बताए ।
मूल आयोजक समितिअन्तर्गत विभिन्न सात वटा समिति गठन गरिएको छ । आर्थिक समिति संयोजक धनराज बी पौडेलले क्याविनेट मिटिङ भव्यरुपमा सम्पन्न गर्न सबै जना तयारीमा लागेका छन् । अर्थिक समितिमा संविधान गिरी, रुचिला सापकोटा, लीला दवाडी र डम्बर गिरी छन् ।
‘क्याविनेट मिटिङलाई सबै किसिमले उत्कृष्ट बनाउन चाहन्छौँ, धेरैभन्दा धेरैको रजिष्ट्रेसन रहोस् भन्ने चाहना छ’, पौडेलले भने ।
प्रिरजिष्ट्रेशनका लागि बाग्मती क्षेत्रमा डिष्ट्रिक्ट को-चिफ एडभाईजर जनार्दन फुँयाल र गण्डकी क्षेत्रमा डिष्ट्रिक्ट को-चिफ एडभाईजर अमृत शोभा खत्रीलाई संयोजक तोकिएको छ ।
उक्त समितिमा सोही क्षेत्रका रिजन चेयरपर्सनलाई जिम्मेवारी प्रदान गरिएको जोन चेयरपर्सन डासीराम अधिकारीले जानकारी दिए ।
पाेखरामा भएको क्याविनेट मिटिङको तयारी छलफलमा सहभागी डिष्ट्रिक्ट गभर्नर विनोद ढुङ्गानाले क्लब सदस्यको उल्लेख्य सहभागिता गराई फेलोसिप गराउने अवसरको सदुपयोग गर्न आग्रह गरे ।
पूर्वडिष्ट्रिक्ट डिष्ट्रिक्ट गभर्नर रामबहादुर बसेलले पर्वतमा पहिलो पटक क्याविनेट मिटिङ हुने भएकाले कोशेढुङ्गा सावित हुने दावी गरे ।
मूल संयोजक पौडेलको अध्यक्षतमा भएको छलफलमा डिष्ट्रिक्ट को-चिफ एडभाइजर अमृत शोभा खत्री, पोखरा क्षेत्रका रिजन चेयरपर्सन ज्ञानबहादुर राना, जीवन प्रकाश श्रेष्ठ, कृष्णकुमार श्रेष्ठ, सूर्य चपाई, बुद्विबहादुर खत्री, नीरा कोईराला र मेनका श्रेष्ठलगायतले बोलेका थिए ।
