लमजुङमा ट्याक्टर दुर्घटना, चालकको घटनास्थलमै मृत्यु

पोखरा । लमजुङमा मंगलबार साँझ ट्याक्टर दुर्घटना हुँदा चालकको घटनास्थलमै ज्यान गएको छ । मृत्यु हुनेमा लमजुङ दोर्दी गाउँपालिका वडा नं ३ केराबारीका वर्ष २२ का सुनिल परियार छन् ।

मंगलबार साँझ करिब ५ः२५ बजे दोर्दी गाउँपालिका वडा नं ५ पाचोकबाट नौथर शेरातर्फ आउँदै गरेको प्र.०२-००१ त ४४८० नं को ट्याक्टर दोर्दी गाउँपालिका वडा नं ४ सादीखोलामा अनियन्त्रित भई सडकबाट एक सय मिटर तल खसेर दुर्घटनामा परेको हो ।

दुर्घटनाको सूचना प्राप्त भएपछि प्रहरीचौकी श्रीभञ्ज्याङबाट प्रहरी सहायक निरीक्षक रेखबहादुर थापाको कमाण्डमा र जिल्ला प्रहरी कार्यालय लमजुङबाट प्रहरी निरीक्षक राजकिशोर शाह तेलीको कमाण्डमा प्रहरी टोली खटिएर परियारको शव अस्पताल ल्याउने कार्य गरेको हो ।

चालक परियारको शव पोष्टमार्टमका लागि जिल्ला अस्पतालमा राखिको प्रहरीले जनाएको । घटनाबारे अनुसन्धान जारी रहेको प्रहरीको भनाइ छ ।