रवि लामिछानेलाई थप चार दिन थुनामा राख्न अनुमति

पोखरा । कास्की जिल्ला अदालतले पूर्व उपप्रधान तथा गृहमन्त्री एवं राष्ट्रिय स्वतन्त्र पार्टी रास्वपाका सभापति रवि लामिछानेलाई थप चार दिन थुनामा राख्न अदालतले आदेश दिएको छ ।

रविसहित पाँचै जनालाई अदालत उपस्थित गराइएकोमा थप चार दिनसम्म थुनामा राखेर अनुसन्धान गर्न आदेश दिएको हो ।

जसमा पूर्वडीआइजी छविलाल जोशी, पोखराका कृष्ण गुरुङ, लीला पछाई, व्यवसायी रामबहादुर खनाल छन् ।

कार्तिक २ गते काठमाडौँबाट पक्राउ परेका लामिछानेलाई ३ गते कास्की ल्याइएको थियो । कास्की जिल्ला अदालत कात्तिक ४ मा छ, कात्तिक ८ मा सात, कात्तिक २० मा १०, कात्तिक २५ मा १३ दिन, मंसिर ९ मा १५, मंसिर २३ मा चार र मंसिर २७ मा पाँच दिन म्याद थप भएको थियो ।

प्रहरीले अनुसन्धान प्रतिवेदन सरकारी वकिललाई बुझाए पनि अध्ययन गर्न समय लाग्ने भएकोले केही दिन म्याद थपको माग गरिएको छ । पुस ५ भित्रै सबै जनाको अभियोग पत्र दर्ता हुने जिल्ला न्यायाधिवक्ता कमला काफ्लेको भनाइ छ ।

सूर्यदर्शन सहकारी ठगीमा ५१ जना प्रतिवादी र एक अर्ब ५१ करोड बिगो मागसहितको प्रतिवेदन जिल्ला सरकारी वकिलको कार्यालयमा बुझाइएको अनुसन्धान अधिकृत, कास्की प्रहरीका सूचना अधिकारीसमेत रहेकअ डीएसपी वसन्तकुमार शर्माले जानकारी दिए ।