नेपालले आज बंगलादेशसँग खेल्दै, जित्नैपर्ने दबाबमा नेपाल

पाेखरा। यू-१९ महिला एसिया कप टी-२० क्रिकेटको सुपर फोरको दोस्रो खेलमा नेपालले आज बंगलादेशसँग खेल्दैछ । खेल मलेसियाको क्वालालम्पुरमा बिहान ११ः४५ बजेदेखि शुरु हुँदैछ । फाइनलमा पुग्नका लागि नेपाललाई यो खेल जित्नैपर्ने दबाब रहेको छ ।

नेपालको समूहबाट नेपाल र भारत तथा अर्को समूहबाट श्रीलंका र बंगलादेश सुपर फोरमा पुगेका हुन् । सुपर फोरमा नेपालले पहिलो खेल श्रीलंकासँग खेलेकामा वर्षाले रद्ध भइ अंक बाँड्नु परेको थियो । भारतले भने बंगलादेशलाई हराउँदा श्रीलंकामाथि पनि हावी भएको छ ।

शीर्ष दुईमा रहने टिमले उपाधिका लागि फाइनल खेल्ने भएकाले नेपाललाई बंगलादेशमाथि जित्नैपर्ने दबाब छ ।

अर्को समूहका टिमसँग एक एक खेल खेल्ने नियमानुसार नेपालले बिहीबार श्रीलंकासँग खेलेको थियो भने आज बंगलादेशसँग खेल्दै गरेको हो ।

अहिलेको अंक तालिका हेर्दा भारतको ५ अंक छ भने बंगलादेशको ४ अंक छ । नेपालको पनि ४ अंक नै छ । श्रीलंकाको ३ अंक छ । आज भारतले श्रीलंकासँग पराजय भोगे पनि फाइनलमा पुग्नेछ । नेपालले बंगलादेशलाई हराउन सक्यो भने फाइनल खेल भारतसँग हुनेछ ।

समूह चरणको खेलमा वर्षाले गर्दा नेपाल र भारतको खेल रद्ध भएको थियो । यद्यपि खेल हुन सकेको भए भारतले सहज विजय हात पार्ने लगभग पक्का थियो । सुपर फोरको पहिलो खेलमा नेपालले श्रीलंकासँग अंक बाँडेको छ ।

मलेसियाको क्वालालम्पुरमा वर्षाले खेल हुन नसकेपछि दुवै टिमले अंक बाँडेका हुन् । बिहीबारको खेलमा नेपालले टस जितेर पहिले बलिङ रोज्दै मैदानमा उत्रिएको भए पनि एक ओभरमात्र सम्भव भएको खेलमा कप्तान पूजा महतोले एक रन दिएर एक विकेट लिइसकेकी थिइन् । तर वर्षाका कारण दोस्रो ओभरसमेत हुन नसकेपछि दुवै टिमले अंक बाँडेका हुन् ।

नेपाल र भारतले अंक बाँडे । नेपालले भारतलाई ९५ रनको चुनौती दिएकामा मलेसियाको क्वालालम्पुरमा ब्याटिङ गर्न उत्रेको भारतले ३.१ ओभर खेल्दै २८ रन बनाएको अवस्थामा वर्षाले खेल अगाडि बढ्न नसकेपछि रद्द भएको हो ।

खेल रद्द भएसँगै दुवै टिमले १-१ अंक बाँडे । दुवै टिमको समान ३-३ अंक भए पनि भारत समूह विजेता बन्दै सुपर फोरमा पुग्यो भने नेपाल उपविजेता बन्दै सुपर फोरमा पुग्यो ।

नेपाल र भारतले पाकिस्तानलाई पराजित गरेका थिए । भारतविरुद्ध नेपालले टस हारेर पहिले ब्याटिङ गर्दै निर्धारित २० ओभरमा ८ विकेटको क्षतिमा ९४ रन बनायो । कमजोर ब्याटिङ गरेको नेपालका लागि कप्तान पूजा महतोले रनआउट हुनुपूर्व ४० बलमा २५ रन बनाइन् ।

त्यस्तै अलिशाकुमारी यादवले ९ बलमा अविजित रहँदै २० रन बनाइन् । नेपालले १८ रन अतिरिक्तका रुपमा पाएको थियो । भारतका लागि परुनिका सिसोदियाले ४ विकेट लिइन् ।

नेपालले पहिलो खेलमा पाकिस्तानलाई ६ विकेटले हरायो । खेलमा पाकिस्तानले पहिले ब्याटिङ गर्दै निर्धारित २० ओभरको खेलमा ५ विकेट गुमाएर १०४ रन बनायो । ओपनर कोमल खानले ४२ बलमा ३८ तथा महम एन्नेसले ३९ बलमा २९ रन बनाइन् ।

नेपालका लागि कप्तान पूजा महतोले २ तथा रचनाकुमारी चोधरी, रिया शर्मा तथा सीमना केसीले १-१ विकेट लिए । जवाफमा १०५ रनको सामान्य चुनौती नेपालले १९ ओभरमै ४ विकेटको क्षतिमा पूरा गरेको हो ।

नेपालका लागि कप्तान पूजा महतोले अलराउन्ड प्रदर्शन गर्दै ४७ बलमा अविजित रहँदै ४७ रन बनाइन् । त्यस्तै सोनी पाख्रिनले १३ तथा सीमना केसीले अविजित रहँदै १२ बलमा १२ रन बनाइन् ।

भारतले यसअघि पाकिस्तानलाई ९ विकेटले हराएको थियो । दुवै खेल हारेसँगै पाकिस्तान बाहिरिएको छ भने नेपाल भारतसँग खेल्नुअघि नै सुपर फोरमा पुगेको थियो ।

अर्को समूहमा श्रीलंका, बंगलादेश र मलेसिया रहेका छन् । बंगलादेशले दुवै खेल जितेको छ भने श्रीलंका एक जितसहित सुपर फोरमा पुगेको छ । मलेसिया दुवै खेल हारेर बाहिरिएको छ । पूजा महतोको कप्तानीमा नेपालले पहिलो पटक विश्वकप टी-२० क्रिकेटमा स्थान बनाएको छ ।

विश्वकपमा छानिएसँगै नेपालले पहिलो पटक आयोजना भएको टी-२० एसिया कपमा पनि स्थान बनाएको हो ।