स्याङ्जामा ट्याक्टर दुर्घटना हुँदा एकको मृत्यु, दुई जना गम्भीर

पोखरा । स्याङ्जामा मंगलबार राति करिब ८ बजे ट्याक्टर दुर्घटना हुँदा एक युवकको ज्यान गएको छ । मृत्यु हुनेमा बाराको गढीमाई नगरपालिका वडा नं.११ का २२ बर्षीय सब्दुल अन्सारी छन् ।

ट्याक्टरले च्यापिएर गम्भीर घाइते भएका उनको कालीगण्डकी अस्पताल मिर्मीमा उपचारकै क्रममा ज्यान गएको जिल्ला प्रहरी कार्यालय स्याङ्जाका सूचना अधिकारी प्रहरी निरीक्षक उमेशलाल श्रेष्ठले जानकारी दिए ।

सोही दुर्घटनामा घाइते भएका बारा कलैया उपमहानगरपालिका वडा नं. १० का २४ वर्षीय अर्जुन शाह र बारा गढीमाई नगरपालिका वडा नं.११ का २६ वर्षीय सलाम मुदिन मन्सुरी घाइते भएका छन् ।

उनीहरुको लुम्बिनी मेडिकल कलेज प्रभास पाल्पामा उपचार भइरहेको प्रहरी निरीक्षक श्रेष्ठले जानकारी दिए ।

स्याङ्जाको कालीगण्डकी गाउँपालिका वडा नं.३ आलमस्थित बिर्घा–मिर्मी पक्की भित्री सडकखण्डमा आलमबाट बिर्घातर्फ जाँदै गरेको लु४त ७८३१ नम्बरको डसना बनाउने मेसिन जोडेको ट्याक्टर अनियन्त्रित भइ दुर्घटना भएको हो ।

ट्याक्टर सडकदेखि करिब ४० मिटर तल खसेको छ ।