पाेखरा । गण्डकी प्रदेशका मुख्यमन्त्री सुरेन्द्रराज पाण्डेले प्रदेश सरकारले प्रेस तथा अभिव्यक्ति स्वतन्त्रताको विपक्षमा कुनै पनि काम हुन नदिने बताएका छन् ।
नेपाल पत्रकार महासङ्घ गण्डकी प्रदेश समितिको नवनिर्वाचित कार्यसमितिको शपथ तथा पदस्थापन कार्यक्रममा उनले प्रेसलाई कुण्ठित गर्न खोजियो भने प्रजातन्त्र कमजोर हुन्छ भन्ने आफूलाई राम्रो अनुभूति रहेको बताएका हुन् ।
नागरिकले पत्रकारिता र सामाजिक सञ्जालबारे भिन्नता छुट्टाउन नसकेको उनले उल्लेख गरे ।
सामाजिक सञ्जालमा आउने हरेक कुरालाई नागरिकले समाचारका रूपमा ग्रहण गरिरहेकाले पत्रकारिता र सञ्जालको फरक स्थापित गर्नुपर्नेमा उनले जोड दिए ।
गण्डकी प्रदेशमा लामो समयदेखि रोकिएको आमसञ्चार विधेयक सरकारले पारित गरेर कानुनअनुसार प्रेस रजिस्टार नियुक्त गरे पनि यो सरकारी निकाय मात्र नभई पत्रकारको हकहितका लागि आवाज उठाउने निकायसमेत रहेको उनले बताए ।
मुख्यमन्त्रीले गण्डकी प्रदेशको समाचारलाई मूलधारका सञ्चार माध्यमले स्थान नदिएको गुनासो गरे ।
उनले भने, ‘जिल्ला र प्रदेशका समाचारलाई केन्द्रले प्राथमिकता दिएको देखिएको छैन, सरकारको पक्षमा लेखिदिनुहोस् भनेर म भन्दिन, पक्ष अथवा विपक्षमा जे भए पनि सरकारका गतिविधिबारे चासो राखेर लेखिदिनुहोस् भन्ने मेरो आग्रह हो ।’
गण्डकी प्रदेशका प्रेस रजिस्टार विमला भण्डारीले प्रेस रजिष्टारको कार्यालयले पत्रकारिताको क्षेत्रमा गर्नुपर्ने कामका लागि सबैको सल्लाह र सुझाव लिएर कार्यविधि बनाउने काम गरिरहेको बताइन् ।
नेपाल पत्रकार महासङ्घका केन्द्रीय सचिव सोनी शर्माले पत्रकार महासङ्घ क्रियाशील पत्रकारको मात्र संस्था बन्नुपर्नेमा जोड दिइन् ।
गण्डकी प्रदेश समितिका नवनिर्वाचित अध्यक्ष रमेश पौडेलले पत्रकारिता पेशामा नयाँ पुस्ताको आकर्षण बढाउने काम गर्ने प्रतिबद्धता जनाए । उनले पत्रकारको हकहितका साथै क्षमता विकासका लागि ११ वटै जिल्लामा कार्यक्रम गर्ने योजना रहेको सुनाए ।
निवर्तमान अध्यक्ष नारायण शर्माले प्रदेश समितिले चुनौतीका बीचमा धेरै काम गरेको बताए ।
अध्यक्षका प्रत्यासी गोविन्द सुवेदीले महासङ्घले सबै पत्रकारलाई समेटेर लैजानुपर्ने र पेशागत आचारसंहिता पालनामा जोड दिए ।
कार्यक्रममा निर्वाचन समितिका संयोजक कोमलनाथ बरालले प्रदेश समितिमा नवनिर्वाचित अध्यक्षसहित पदाधिकारी र कार्यसमितिका सदस्यलाई पद तथा गोपनीयताको शपथ गराएका थिए ।
