आगोले बेलुन विस्फोट हुँदा पोखराका मेयर र अर्थमन्त्री पौडेल घाइते, उपचारका लागि काठमान्डौ लगियो

पोखरा । पोखरा भ्रमण वर्ष २०२५ को उद्घाटनका क्रममा बेलुनमा सल्किएको आगोबाट अर्थमन्त्री विष्णु पौडेल र पोखरा महानगरपालिका मेयर धनराज आचार्य घाइते भएका छन् ।

प्रदर्शनी केन्द्रमा बेलुन उडाएर कार्यक्रमको उद्घाटन गर्ने क्रममा आगो सल्किएर बेलुन विस्फोट हुँदा  उक्त दुर्घटना भएको हो ।

बेलुन उडाउने क्रममा नजिकै उत्सव मनाउन गरिएको कोल फायरको आगोको झिल्का मेयर आचार्य र अर्थमन्त्री पौडेलले समातेको बेलुनमा सल्किएको हो । आगोले उनीहरुको हात र गालामा  जलेको छ ।

उनीहरुलाई पोखरामा प्राथमिक उपचार पश्चात सिम्रिक एयरको हेलिकप्टर मार्फत थप उपचारका लागि कीर्तिपुरस्थित बर्न अस्पताल लगिएको छ ।

घाइते पौडेलको गण्डकी मेडिकल कलेज र आचार्यको फिस्टेल अस्पतालमा प्राथमिक उपचार गरेर काठमाडौं लगिएको हो ।

पोखरामा २० लाख पर्यटक भित्र्याउने लक्ष्यसहित पोखरा महानगरले पोखरा भ्रमण वर्ष २०२५  घोषणा गर्न लागेको हो ।