पोखरा । रुस-युक्रेन युद्धमा परेर लमजुङका एक युवकको ज्यान गएको छ ।
मृत्यु हुनेमा लमजुङको दूधपोखरी गाउँपालिका वडा नं. १ घामरचोकका ३२ वर्षीय साजन गुरुङ रहेका छन् ।
उनको मृत्यु भएको खबर पाँच दिन अघिमात्र परिवारलाई प्राप्त भएको बताइन्छ ।
वडाध्यक्ष दुर्गामान गुरुङका अनुसार जर्मनीमा रहेका मृतकका भाइ कुमार गुरुङलाई उक्त खबर गुरुङसँगै रुसी सेनामा पुगेकाहरुले पठाएको वडाध्यक्षले बताए ।
साजनको मृत्युको खबर घर परिवारले थाहा पाएपछि पुस २९ गते क्रियाकर्मसमेत गरिसकेको बताइन्छ ।
जगारीका लागि भन्दै साढे तीन महिना अघि उनी रुसी सेनामा पुगेका थिए ।
उनको घरमा बुबा, आमा, श्रीमती र एक छोरा छन् ।
