काठमाण्डौ। सरकारले चैत ९ देखि २१ गतेसम्म अत्यावश्यक बाहेकका सम्पूर्ण निजी तथा सार्वजनिक सेवा बन्द गर्ने घोषणा गरेको छ ।
शुक्रबार राष्ट्रको नाममा विशेष सम्बोधन गर्दै प्रधानमन्त्री केपी शर्मा ओलीले कोरोना भाइरस कोभिड-१९ को संक्रमण फैलिन नदिन सचेतना अपनाउदै अत्यावश्यक बाहेकका सेवा बन्द हुने बताएका हुन् । यस अवधिमा चालू हुने र बन्द हुने सेवाबारे नेपाल राजपत्रमा सूचना जारी हुने प्रधानमन्त्री ओलीले जानकारी दिए ।
यस अवधिमा अत्यावश्यक अवस्थामा बाहेक घरबाट बाहिर ननिस्कन, भीडभाडमा नजान, सरसफाइमा ध्यान दिन, अनावश्यकरुपमा खाद्यान्नको सञ्चित नगर्न, चिकित्सकको सल्लाह लिन र आतङ्कित नहुन प्रधानमन्त्री ओलीले आह्वान गरे ।
बजारमा कृत्रिम अभाव हुन नदिन र भएको पाइएमा कडा कारवाही गरिने प्रधानमन्त्री ओलीले स्पष्ट पारेका छन् ।
सम्बोधन मार्फत प्रधानमन्त्री ओलीले सरकारले चैत १० गते सोमाबरदेखि लामो दुरीका सार्वजनिक सवारी साधनहरु सञ्चालनमा रोक लगाउने भएको जानकारी दिए ।
सरकारले सबै अन्तर्राष्ट्रिय उडान चैत ९ गतेदेखि १९ गतेसम्मका लागि स्थगित गर्ने निर्णय समेत गरेको छ।
