पोखरा न्युज ।
हिउँदमा समस्या आउँदैन् । वर्षामा पीडाले सताउँछ । ढलको व्यवस्थापन नहुदाँ काजीपोखरीको भलले पोखरा महानगरपालिका १४ को सुकुम्बासी बस्ती डुबानमा पर्छ । बस्तीमा खानेपानी समस्या छ । त्यो भन्दा ठूलो पीडा लालपूर्जा छैन् । लालपूर्जा नहुदाँ गैरदेशीय नागरिक जस्तो बन्नुपरेको पीडा उनीहरुले सुनाइरहेका थिए ।
“सुकुम्बासीलाई लालपूर्जा देउ ।” आफनो माग सुनाउँदै पोखरा महानगरपालिकाका १४ का सुकुम्बासीका अगुवा प्रेम नेपालीले भने–“बसेको ठाँउको लालपूर्जा नहुदाँ गैर नागरिक जस्तो भईएको छ ।” उनले हरेक सरकारी कामकाजको लागि नागरिकता र लालपूर्जा माग्छन भन्दै नभएको लालपूर्जा कसरी दिने प्रश्न गरे?
लामो समयदेखि सुकुम्बासी बस्तीमा बस्दै आएकी कृष्णमाया भुजेलले पनि उस्तै पीडा दर्शाईन् । “हामीलाई बसिरहेको सुकुम्बासी बस्तीबाट समेत हटाउने प्रयास गरिएको छ ।” उनले भनिन–“चुनावकै समयमा राजनीतिक समस्याको रुपमा वर्षेनी उठाईन्छ तर समाधान कहिल्यै हुन सकेन् ।” उनले अबको चुनावपछि पनि केवल आश्वासन र प्रतिबद्धताले मात्रै नहुने जिकिर गरिन् । पोखरा महानगरपालिका १४ मा झण्डै १६८० सुकुम्बासी घरपरिवार छन् ।
नेपाली काँग्रेस कास्कीले सुकुम्बासी समस्या समाधानको लागि आफनो प्रतिबद्धता गर्यो । बसेकै ठाँउमा लालपुर्जा उपलब्ध गराई समाधान गर्ने प्रतिबद्धता जनाएका हुन् । “सुकुम्बासी समस्या समाधान गर्न काँग्रेसले प्रतिबद्धता गर्छ ।” पोखरा महानगरपालिका १४ का सुकुम्बासीसँगको छलफलमा कास्की क्षेत्र न १ प्रदेश खका उम्मेदवार कृष्णबहादुर केसीले भने–“आफनो प्रतिबद्धताप्रति बेईमानी गरेभने अर्को पटक काँग्रेसले तपाईहरुसँग भोट माग्न आउँदैन् ।”
नागिन टोलको सुकुम्बास समस्या, भगवतीटारबाट पहिरोपीडित परिवार र सार्वजनिक जग्गामा बसोबास गर्ने तीन खाले सुकुम्बासी समस्या रहेको उल्लेख गरे । उनले वर्षेनी समस्या चुनाव अगाडि उठाउने र चुनावपछि हराउने प्रवृत्ति राजनीतिक सस्कृति बनेको बताए । उनले सुकुम्बासी समस्याको समाधानको लागि आफुले मात्रै जितेर नहुने भन्दै काँग्रेसले नै जित्नुपर्नेमा जोड दिए ।
“राजनीति गर्ने व्यक्ति फेरिनुपर्छ, आफै पनि फेरिनुपर्छ ।” उनले भने–“पहिलो पटक चुनावमार्फत जनताको माझमा आएको छु । जितेभने तपाईको समस्या समाधान गर्छु । हारे भने तपाईको कागजपत्र झोलामा राखेर आफैं पहलकदमी गर्छु । यो मेरो प्रतिबद्धता हो ।” नेपाली काँग्रेस कास्कीका सभापति समेत रहेका उम्मेदवार केसीले थपे–“तपाईहरुको समस्या समाधान गर्न सकिन भने राजनीति नै छोड्छु ।” उनले कसैलाई पिडाएर चिढाएर राजनीति गर्न नहुने जिकिर गरे ।
कास्की क्षेत्र १ प्रतिनिधि सभा सदस्यका उम्मेदवार एव कानून मन्त्री यज्ञबहादुर थापाले सुकुम्बासीलाई सम्बोधन गदैै लालपूर्जा दिई समृद्धि बनाउने अभियानमा काँग्रेस सदैवमा लागि परेको बताए । “काँग्रेसले जित्नुपर्छ । तपाईहरुलाई लालपूर्जा दिई समृद्धि बनाउने काम काँग्रेसले गर्छ ।” मन्त्री थापाको भनाई थियो ।
छलफलमा नेपाली काँग्रेस कास्कीका समानुपातिक उम्मेदवार आनन्दराज मुल्मी, कास्की प्रदेश नं १ ख की सञ्चार संयोजक सरस्वती गुरुङ, भूमिहीन मन्च कास्कीका आसबहादुर गुरुङ लगायतको उपस्थिति थियो ।
