पोखरा । गण्डकी प्रदेश सरकारले कोरोनाका कारण स्वदेश तथा विदेशमा रोजगारी गुमाएका युवाहरूलाई रोजगारी प्रदान गर्न तथा स्वरोजगार बनाउन १८ करोड ४२ लाख रुपैयाँ बिनियोजन गरेको छ ।
सोमबार गण्डकी प्रदेशको बजेट प्रस्तुत गर्दै आर्थिक मामिला तथा योजना मन्त्री किरण गुरुङले स्वदेश तथा विदेशमा कोभिडबाट प्रभावित युवाहरूलाई रोजगारी प्रदान गर्न तथा स्वरोजगार बनाउन आवश्यक सीप, पुँजी र प्रविधि उपलब्ध गराउन १८ करोड ४२ लाख रुपैयाँ बिनियोजन गरिएको बताए ।
युवाहरुलाई स्वरोजगार बनाउन संघ र स्थानीय तहको साझेदारीमा व्यवसायिक तथा सीप विकास तालिम केन्द्र मार्फत सञ्चालन हुने व्यावसायिक तालिमका लागि १० करोड ५० लाख र प्राविधिक शिक्षा तथा व्यवसायिक तालिम केन्द्र मार्फत सञ्चालन हुने तालिमका लागि ९ करोड ८९ लाख रुपैयाँ विनियोजन गरिएको मन्त्री गुरुङले बताए ।
सरकारले कोभिड–१९ बाट मारमा परेकाहरुको रक्षाका लागि १ अर्ब रुपैयाँको व्यवसाय जीवन रक्षा कोषको पनि घोषणा गरेको छ । सरकारले उक्त कोषबाट कोरोना महामारीका कारण प्रभावित उद्योग व्यवसायलाई जोगाउन, टिकाउन र सुचारू गर्न विशेष कार्यक्रम सञ्चालन गर्ने मन्त्री गुरुङले बताए ।
प्रदेशमा कोभिड लक्षित कृषि कार्यक्रमका लागि १८ करोड ५० लाख र पर्यटन तर्फ २ करोड ५ लाख रुपैयाँ बिनियोजन भएको छ ।
