पोखरा न्यूज । पोखरामा प्रहरीले १८ जना जुवा खेल्ने र खेलाउनेहरु लाखाै नगदसहित पक्राउ गरेकाे छ ।
गण्डकी प्रदेश प्रहरी कार्यालय पोखराका प्रहरी वरिष्ठ उपरीक्षक मोहनप्रसाद पोखरेलले दिएको जानकारी अनुसार पाेखरासहित प्रदेशका विभिन्न ठाँउबाट जुवा खेल्ने र खेलाउने ३३ जना ठूलो रकमसहित पक्राउ परेका हुन् ।
वडा प्रहरी कार्यालय रामबजार पोखराको प्रहरी टोलीले १८ जनालाई ठूलो रकमसहित शनिबार पक्राउ गर्न सफल भएको हो । कास्की जिल्लाकाे पोखरा महानगरपालिका वडा न १२ चापापानीमा रहेको थकाली समाजघरमा जुवातास खेलिरहेको अवस्थामा उनीहरु पक्राउ परेका हुन् ।
प्रहरीले विशेष सूचनाको आधारमाा मार्फा थकाली समाज घरबाट नगद ६ लाख २४ हजार ९८६ रुपैयाँसहित ८ बुक तास, ६४ थान कौडा र ४ लाख ५० हजार रुपैयाको २ थान चेक पनि बरामद गरेको जनाएको छ । त्यसैगरी पाउण्ड स्ट्रलिङ २० डलर, अमेरिकन ७ डलर र भारतीय रुपैया ४ हजार ७०० रुपैयाँ पनि बरामद भएकाे छ ।
त्यसैगरी नवलपुरमा प्रहरील टोलीले शुक्रबार कावासोती नगरपालिका वडा नं १६ डण्डास्थित एकघरबाट पनि ११ जना जुवाडे पक्राउ गरेको जनाएको छ । उनीहरुलाई जुवा खेलिरहेको अवस्थामा नगद २६ हजार ६२५ रुपैयाँ र तीन बुक तास सहित पक्राउ गरेको छ ।
त्यस्तै शनिबार इलाका प्रहरी कार्यालय आँबुखैरेनी तनहुँको प्रहरी टोलीले पनि बिशेष सूचनाका आधारमा आँबुखैरेनी गाँउपालिका वडा न ३ आँबुखैरेनी बस्ने मनबहादुर श्रेष्ठको घरमा जुवा खेलिरहेको अवस्थामा ७ जनालाई पक्राउ गरेको छ । उनीहरुको साथबाट प्रहरीले नगद १ लाख ११ हजार ४४० रुपैयाँ र १३ बुक तास बरामद गरेको जनाएको छ ।
प्रहरीले पक्राउ परेका सबैजना उपर जुवा सम्बन्धि कसुर अन्तर्गत मुद्दा दर्ता गराई थप अनुसन्धान समेत गरिरहेको जानकारी दिएको छ ।
