पाेखरा न्यूज । अमेरिकी डलर साट्ने भन्दै ठगी गर्न खोजेको अभियोगमा काठमाडौंमा एक युवक पक्राउ परेका छन् ।
सिन्धुपाल्चोककाे बाह्रबिसे नगरपालिका-३ घर भइ गोकर्णेश्वर-८ बस्ने २७ वर्षीय मिन बहादुर पाइनलाई बुधबार दिउँसो गोकर्णेश्वर नगरपालिका-८ जगडोलबाट प्रहरीले पक्राउ गरेको छ ।
पाइन लगायत ३ जनाले ललितपुर सातदोबाटो बस्ने झापाकाे बिर्तामोड घर भएका २१ वर्षीय पुरुषलाई अमेरिकी डलर साट्ने भन्दै ठगी गर्न लागेको अवस्थामा महानगरीय प्रहरी वृत्त बौद्धबाट खटिएको प्रहरीले पक्राउ गरेकाे हाे ।
पाईनलाई ५० दरको ११ थान अमेरिकी डलर, १ दरको १ थान अमेरिकी डलर, २० रुपैयाँ दरको ३ सय ३९ थान नोट, १० रुपैयाँ दरको ३ सय ६७ थान नोट, ४ थान मोबाइल, प्रदेश ०२-३० प ६९१६ नम्बरको मोटरसाइकल र पीडितको ५ लाख रुपैयाँ सहित फेला पारी पक्राउ गरेको प्रहरीले जनाएकाे छ ।
फरार अन्य २ जनाको खोजी गर्नुका साथै साे घटनाबारे प्रहरीले थप अनुसन्धान गरिरहेको जनाएकाे छ ।
