पोखरा न्यूज । नेकपा एकीकृत समाजवादीका अध्यक्ष माधवकुमार नेपालले राष्ट्रिय सभा तथा रिक्त रहेको पदको चुनावमा एमालेलाई ‘क्लिन स्वीप’ पार्ने बताउनुभएको छ । बिहीबार विराटनगर विमानस्थलमा सञ्चार कर्मीसँग कुरा गर्दै अध्यक्ष नेपालले गठबन्धन दलहरूले साझा उम्मेदवार उठाएर एमालेलाई ‘क्लिन स्वीप’ पार्ने दाबी गर्नुभएको हो ।
उहाँले एमाले अध्यक्ष केपी शर्मा ओली आफै ठेगान लागिसेकेको समेत बताउनुभएको छ । समय र परिस्थितिले नै ओलीलाई ठेगान लगाइसकेको उहाँले बताउनुभएको हो ।
अध्यक्ष नेपाल सर्वोच्च अदालतका प्रधानन्यायाधीश चोलेन्द्रशम्शेर जबरा र न्यायाधीशहरूको राजीनामाको बचाउमा उत्रिनुभएको छ । ओलीले प्रधानन्यायाधीश र न्यायाधीशको राजीनामा माग्नु ‘वाहियात’ कुरा भएको र रिस पोख्नु बाहेक केही नभएको भन्दै उहाँले प्रतिक्रिया दिनुभयो ।
उहाँले उच्च स्तरीय राजनीति संयन्त्र काम गर्नका लागि बनाइएको बताउनुभएको छ । प्रतिपक्षी एमालेले विरोध गरिरहेको छ नि भन्ने सञ्चारकर्मीको प्रश्नमा उहाँले राम्रो नदेख्ने संस्कार भएकाले विरोध गर्ने गरेको प्रतिक्रिया दिनुभएको हो । ‘गठबन्धन फुट्छ भन्ने हल्ला फिँजाइएको छ,’ नेपालले भन्नुभयो, ‘यो संयन्त्रले त्यसलाई पनि दरिलो बनाउँछ ।’
आफ्नो पाटीको लहर देखेर अरू शक्ति आत्तिएको समेत उहाँले बताउनुभयो । विप्लव तथा वैद्यसँग बाम एकता गर्ने विषयमा छलफल भइरहेको उहाँले बताउनुभयो । बिचार मिल्नेहरूसँग एकता गर्न सकिने उहाँको भनाइ थियो ।