पोखरा न्यूज – ७, कार्तिक । तिहार पर्वको अवसरमा यस बर्ष पनि पोखरामा भाइटिका महोत्सव हुने भएको छ । पश्चिमाञ्चल होटल संघ पोखराको आयोजनामा यही कात्तिक १२ गते भाइटिकाको दिन पोखराको लेकसाइड स्थित बटरफ्लाई चाइल्ड केयर सेन्टरमा १३ औ भाइटिका महोत्सव हुने भएको हो ।
नेपाली संस्कृतिको संरक्षण गर्दै पर्यटनको प्रवर्द्धन गर्ने उद्धेश्यले भाइटिका महोत्सवलाई निरन्तरता दिदै आएको संघका अध्यक्ष विकल तुलाचनले बताए । स्वदेशी तथा विदेशी पर्यटक माझ आपसी भाइचाराको अभिवृद्धि गर्दै राष्ट्रिय तथा अन्तर्राष्ट्रिय स्तरमा नेपाली संस्कृतिलाई पहिचान प्रदान गर्न महोत्सवले थप टेवा पुग्ने उनले जनाए । कार्यक्रम भाइटिकाको दिनमा अपरान्ह २:३० बजेपछि शुरु हुनेछ ।
रेन्वो चिल्ड्रेनका २० जना बहिनीहरुले पर्यटकहरुलाई दाजुको रुपमा सप्तरंगी टिका लगाउने कार्यक्रम रहेको संघका द्धितिय उपाध्यक्ष एवं कार्यक्रम संयोजक दीपक श्रेष्ठले बताए । महोत्सवमा नेपाली परम्परा अनुसार पर्यटकलाई तिहारको टिका लगाउने, देउँसी भैलो खेल्ने. उपहार आदानप्रदान र सेलरोटी लगायतका खानाका परिकार खाने खुवाउने कार्यक्रम रहेको संयोजक श्रेष्ठले जनाए । महोत्सबको लागि सम्पूर्ण तयारी पुरा भएको र महोत्सवमा सहभागिताका लागि नाम दर्ता गर्ने क्रम समेत शुरु भैसकेको संयोजक श्रेष्ठले बताए ।
यस बर्ष करिब १२ देशका १ सय जना पर्यटकहरु महोत्सवमा सहभागि हुने उनले बताए । भाइटिका महोत्सबमा सहभागी हुन पर्यटकले १५ डलर तिर्नुपर्ने र उक्त रकम टिका लगाइदिने बहिनीलाई दक्षिणा, टोपी, सल, भाइटिका मसला, खाना, पेय पदार्थ आदिमा खर्च हुने श्रेष्ठले जनाए ।
भाइटिका महोत्सवको निरन्तरतासँगै पछिल्ला वर्षहरुमा केहि पर्यटकहरु दोहो¥याएर समेत टिका लगाउन पोखरा आउन थालेको पर्यटन व्यवसायी एवम् बटरफ्लाई चाइल्ड केयर सेन्टरका संचालक गोबिन्दराज पहारीले जनाए । होटल संघको आयोजना तथा विभिन्न संघ सस्थाको प्रायोजनमा संचालन हुने महोत्सबले नेपाली संस्कृतिलाई विश्व माझ परिचित गराउदै पर्यटन प्रवर्द्धनमा टेवा पुर्याएको पहारीले बताए ।
महोत्सवलाई नेपाल पर्यटन बोर्डले प्रवर्द्धन गरेको छ भने ट्याम्पल ट्रि रिसोर्ट र बटरफ्लाई चाइल्ड केयर सेन्टर लगायतका संघ सस्था सहयोगीको रुपमा रहेका छन्। महोत्सव सम्पन्न गर्न करिब १ लाख ५० हजार खर्च लाग्ने आयोजक संघले जनाएको छ ।
