ब्याजदर घटाउन राष्ट्र बैंकलाई पोखरा चेम्बरको ज्ञापनपत्र

पोखरा चेम्बर अफ कमर्स कास्कीले बैंक तथा वित्तीय संस्थाहरुमा वृद्धि भएको ब्याजदर घटाउन माग राख्दै नेपाल राष्ट्र बैंकलाई ज्ञापनपत्र पठाएको छ ।

चेम्बर कास्कीले मंगलबार बैंक तथा वित्तीय संस्थाहरुमा वृद्धि गरिएको ब्याजदरको विरोध गर्दै नेपाल राष्ट्र बैंकका गर्भनरलाई ६ बुदेँ माग राख्दै नेपाल राष्ट्र बैंक गण्डकीका प्रमुख रामशरण खरेलमार्फत ज्ञापनपत्र पठाएको हो । ज्ञापनपत्र खरेललाई बुझाए पछि बोल्दै चेम्बर कास्कीका अध्यक्ष यामनाथ पौडेलले कोरोना, रुस-युक्रेन युद्धले थलिएको व्यवसायलाई बैंक तथा वित्तीय संस्थाहरुमा ब्याजदर बढाएर थप पीडा दिएको बताए ।

‘कोभिड १९ ले व्यवसायीहरु अछुत रहन सकेनन्’, उनले भने, ‘कोभिडपछि रुस र युक्रेनको युद्धका कारण धरापमा परेको नेपाली व्यवसायीहरुलाई नेपाल राष्ट्र बैंकले ब्याजदर वृद्धि गरेर थप पीडा दिएको छ । यो निर्णय फिर्ता लिन हाम्रो माग हो ।’ उनका अनुसार चेम्बरले आकासिदो ब्याजदर नियन्त्रणका लागि हाल विद्यमान ४.४ प्रतिशतको स्प्रेड दरमा १ प्रतिशत घटाउन माग गरेको छ ।

बैंकहरुको आधार दरलाई न्यूनतम विन्दुमा कायम गरिनुपर्ने, कर्जामा आधार दरको अधिकतम २ प्रतिशत सम्म प्रिमियम थप हुने गरी व्यवस्था गर्न पनि चेम्बरले माग गरेको छ । ज्ञापनपत्र हस्तान्तरण कार्यक्रममा चेम्बर्स आफ कमर्श गण्डकी प्रदेशका अध्यक्ष किसान सुनारले व्यवसायीहरुहरुलाई धरापमा पार्ने गरी ब्याजदर बृद्धि गरेको बताए ।

‘व्यापार व्यवसाय फस्टाएमात्र देश समृद्ध हुन सक्छ’ उनले भने,‘ देश समृद्ध बनाउन व्यापार व्यवसाय फस्टाउन पर्छ तर राष्ट्र बैंकले व्यवसायीहरुको विरुद्ध ब्याजदर वृद्धि गरेर व्यवसाय धरापमा पारेको छ ।’ यस्तै चेम्बर पोखराले नेपाल राष्ट्र बैंकले वाणिज्य बैकहरुलाई वाणिज्य ऋण प्रवाह गर्दा विगत ६ महिना ५ प्रतिशतबाट ८.५ प्रतिशत पुर्याएको र त्यसलाई ५ प्रतिशत नै कायम गर्न माग गरेको छ ।

बढाएर ९० प्रतिशत पुर्याइएको सिडि रेसियो पहिले जस्तै ८५ प्रतिशत नै कायम गर्न पनि चेम्बरले माग गरेको छ । त्यसैगरि सो ज्ञापनपत्रमा प्रत्येक त्रैमासिकमा पुँजीगत खर्चको समीक्षा गरिनुपर्ने र खर्चको लक्ष्य प्राप्तिको लागि प्रभावकारी पहल गरिनुपर्ने माग राखिएको छ ।

चेम्बरले स्थानीय, प्रदेश तथा संघीय सरकारअन्तर्गतका निकायहरुको खातामा रहेको पुँजीगत रकम खर्च हुने नसकेको अवस्थामा रकमको ९५ प्रतिशत रकम वाणिज्य बैंकहरु मार्फत कर्जा प्रवाह गर्ने सुविधा प्रदान गर्न व्यवस्था गर्न माग गरेको छ ।

ज्ञापनपत्र हस्तान्तरण कार्यक्रममा पृथ्वी बस सञ्चालक कम्पनी प्रालिका अध्यक्ष योगेन्द्र बहादुर केसी लगायत व्यवसायीहरुको उपस्थिति रहेको थियो । ज्ञापनपत्र बुझाउनुअघि पोखरा मालेपाटनस्थित चेम्बर्स अफ कमर्स कास्कीको कार्यालयबाट पर्स्याङ, सिद्धार्थचोक, विपी चोक, न्यूरोड, सिर्जनाचोक हुँदै नेपाल राष्ट्र बैंक गण्डकी प्रदेशको कार्यालय पुगरे ज्ञापनपत्र बझाइएको थियो ।

guest
0 प्रतिकिया
Inline Feedbacks
सबै प्रतिक्रिया हेर्नुहोस्
Back to top button