नक्कली सुन धितो राखी वाणिज्य बैंकबाट २४ लाख कर्जा लिने एक पुरुष पोखराबाट पक्राउ परेका छन् ।
पर्वतको कुश्मा घर भई हाल पोखरा-१८ बस्दै आएका २५ वर्षीय अभिषेक सुनार नक्कली सुन धितो राखी ऋण लिएको अभियोगमा पक्राउ परेका हुन् । सुनारले पोखरा-१७ विरौटामा रहेको राष्ट्रिय वाणिज्य बैंक लिमिटेड कास्कीबाट १६ लाख ६० हजार र वाणिज्य बैंककै पोखरा-८ पृथ्वीचोकमा रहेको अर्को शाखाबाट सात लाख ४५ हजार गरि कुल २४ लाख पाँच हजार रुपैयाँ कर्जा लिएका थिए ।
लामो समयसम्म कर्जाको व्याज तथा साँवा बुझाउन नआएपछि बैंकले शंका लागि सुनारले धितोमा राखेको गरगहना चेक गर्दा कमसल सुन प्रयोग गरी तयार गरिएको गरगहना रहेको पत्ता लागेको थियो । गरगहना चेकजाँचका लागि नेपाल सुनचाँदी व्यवसायी संघ कास्की पठाइएकोमा चेकजाँचका क्रममा नक्कली सुन पुष्टि भएको प्रहरीले जनाएको छ ।
सुनारलाई पक्राउ गरी कास्की जिल्ला अदालतबाट ठगी, आपराधिक विश्वास घात तथा आपराधिक लाभसम्बन्धि कसुरमा पाँच दिन म्याद थप गरी अनुसन्धान प्रक्रिया अगाडि बढाइएको पनि प्रहरीले उल्लेख गरेको छ ।
