पोखरा । पर्वतको कुश्मा नगरपापिलका–३ दुर्लुङको ढकालबारीमा शनिबार बेलुका भीषण वर्षासँगै आएको पहिरोमा पुरिएका आठ जनाको शव फेला परेको छ । पहिरोमा परेर १३ बर्षिय जेनिस बिक हालसम्म पनि वेपत्ता रहेको प्रहरीले जनाएको छ ।
शनिबार बेलुका मुसलधारे वर्षापछि आएको पहिरोमा पुरिएर काफलचौरका ५८ बर्षीय तुलबहादुर थापा, उनकी श्रीमती ५२ बर्षिया मीनकुमारी थापा, छोरी ३० बर्षिया दीपा थापा र नातिनी ८ बर्षिया विविशा थापा, सम्राट थापा र विवेक थापाको शव फेला परेको प्रहरीले जनाएको छ ।
यस्तै सोहि स्थानका अर्को घरकी कमला विक र प्रमिसा विकको शव फेला परेको गण्डकी प्रदेश प्रहरी कार्यालय पोखराले जनाएको छ । बेपत्ता हुने जेनिस कमला विकका घरका हुन् ।
उनको खोजी भइरहेको प्रहरीले जनाएको छ । पहिरो गएलगत्तै नेपाल प्रहरी, नेपाली सेना, सशस्त्र प्रहरी र स्थानीय बासिन्दा उद्धारमा खटिएका थिए ।
शनिबार बेलुका ६ बजेदेखि झण्डै दुई घण्टा आएको मुसलधारे पानीपछि पहिरो गएको हो । पहिरोले उनीहरुका घरमा रहेका अन्य पशु चौपाया समेत मरेका छन् ।
