पोखरा न्यूज । सामुदायिक वन उपभोक्ता महासंघ गण्डकी प्रदेशले वन पैदावारमा आधारित उद्योग सञ्चालन गर्ने भएको छ ।
महासंघको पोखरामा सम्पन्न आठौ पूर्ण बैठकले उद्योग स्थापना गरी सञ्चालन गर्ने निर्णय गरेको हो । गण्डकी प्रदेश सरकार, प्रदेश अन्तर्गतका सामुदायिक वन समूह तथा निजी क्षेत्रको लगानीमा वन क्षेत्रमा खेर गैरहेका वन पैदावारको उपयोग गरी आयआर्जनसहित रोजगारी सिर्जना गर्ने खालका उद्योग संचालन गर्ने भएको हो ।
सामुदायिक वन क्षेत्रमा रहेको काठ र गैरकाष्टलाई आधुनिक प्रविधिको माध्येमबाट बजारको आवश्यकता अनुसारका बिभिन्न कच्चा पदार्थ लगायत तैयारी फर्निचर उत्पादन गरी बिक्री वितरण गर्ने लक्ष्य रहेको महासंघ गण्डकी प्रदेशका अध्यक्ष कालीदास सुवेदीले जानकारी दिनुभयो । “गण्डकी प्रदेशको गौरवको योजनाका रुपमा सञ्चालन गरिने सो उद्योग स्थापना र सञ्चालनका लागि प्रदेश महासंघमा आवद्ध तीन हजार ९०० सामुदायिक वन उपभोक्ता समूहलाई लगानी गर्न आव्हान गरिने बैठकले निर्णय गरेको छ” उहाँले भन्नुभयो,“२० करोड भन्दा बढी लगानी हुने सो उद्योगबाट पहाडी बन क्षेत्रमा रहेका चिलाउने, कटुस, उत्तीस, सल्ला आदि बन पैदावारको प्रशोधन गरी कम्पोजिट उड, फिङगरजोन्ट, काठको सिजिनिङ र उपचार समेत गरिने छ ।”
वनबाट रोजगारीका अवसर सिर्जना गर्दै सामुदायिक वनलाई आत्मनिर्भर हुनेतर्फ उन्मुख हुने आधार बन्ने बताउँदै उहाँले यस अभियाले एक वन एक उद्यम अभियानलाई समेत टेवा पुग्ने विश्वास व्यक्त गर्नुभयो । सामुदायिक वन उपभोक्ता महासंघ गण्डकीका सचिव किशोर सापकोटाका अनुसार महासंघको लामो संघर्षको कारण बैज्ञानिक वन पद्धति खारेज गरेकोमा नेपाल सरकारप्रति आभार व्यक्त गर्दै निर्णयलाई पूर्णरुपमा कार्यान्वयन गर्न बैठकले सम्वन्धित निकायलाई अनुरोध गरेको छ ।
प्रदेश महासंघको परिषद बैठक आगामी फागुन २५ गते गर्ने समेत निर्णय गरेको बताउँदै उहाँले त्यसका लागि महासंघका केन्द्रीय सदस्य, प्रदेश पदाधिकारी तथा सदस्यहरु र स्थानीय महासंघमा आवद्ध सम्पूर्णको साथ र सहयोग रहने विश्वास व्यक्त गर्नुभयो ।
