पोखरा न्यूज । प्रधानमन्त्री केपी शर्मा ओलीका प्रेस सल्लाहकार सूर्य थापाले वरिष्ठ नेता झलनाथ खनाल र माधवकुमार नेपाल समूहले वार्ताकाे कलाविहिन नाटक गरेकाे बताउनु भएकाे छ ।
साेमबार नेपाल कम्युनिष्ट पार्टी एमाले संसदीय दलको निर्देशनलाई अवज्ञा गर्दै साे समूह संसदमा मतदानमा अनुपस्थित भएपछि प्रतिक्रिया दिँदै थापाले यस्तैलाइ पाखण्डीपन भनिन्छ हाेला ? भन्दै टिप्पणी गर्नुभएकाे छ ।
एमालेकै वरिष्ठ नेता खनाल र नेपाल समूहका २८ जनासांसद मतदानमा अनुपस्थित हुनु भएको हो । प्रधानमन्त्री एवं एमाले अध्यक्ष ओली प्रतिनिधि सभाबाट विश्वासको मत लिन असफल हुनुभएको छ ।
प्रधानमन्त्रीका प्रेस सल्लाहकार थापाले सामाजिक संजालमा यस्ताे लेख्नुभएकाे छः
केही मान्छेहरूकाे जिन्दगी विराेधाभाषले भरिएको र राेचक पाइन्छ, आफ्नै पार्टीकाे सरकारविरुद्ध राजीनामा दिने हल्ला गर्छन्, सांसदहरूलाई तिनैले विराेधमा उकास्छन्, तथानाम बाेल्छन्, अहाेरात्र पार्टी कब्जा, विखण्डन र विभाजनको कृत्य गर्छन् र पार्टी एकताकाे आँसु पनि झार्दै तिनैले वार्ताका कलाबिहीन नाटक पनि गरेका देखिन्छन् ! सायद यस्तैलाई पाखण्डीपन भनिन्छ हाेला?
