पोखरामा आजदेखि फेवा नव वर्ष महोत्सव

पोखरा । होटल संघ पोखराको आयोजनामा पोखरामा आजदेखि २०औँ फेवा नव वर्ष महोत्सव सुरु हुँदै छ । महोत्सव आगामी वैशाख १ गतेसम्म सञ्चालन हुने छ ।

पर्यटकलाई लक्षित गरी संघअन्तर्गतका सदस्य होटेलहरूले महोत्सव अवधिभर आफ्नो प्रकाशित दररेटमा २० प्रतिशत छुट प्रदान गर्ने घोषणा गरेका छन् ।

संघका अध्यक्ष तथा महोत्सव संयोजक लक्ष्मण सुवेदीका अनुसार भक्तपुरको प्रसिद्ध बिस्केट जात्रा, गण्डकी प्रदेशका ११ जिल्लाका मौलिक संस्कृति, बाजागाजा, भजन तथा रत्यौली कार्यक्रमहरू महोत्सवमा प्रस्तुत गरिने छन् ।

महोत्सवमा प्रदेशस्तरीय मौलिक तथा रैथाने परिकारहरूको प्रदर्शनी, सांस्कृतिक कार्यक्रम, मनोरञ्जनात्मक खेलकुद तथा पर्यटक दौड प्रतियोगिता रहनेछ । पर्यटन, संस्कृति र स्थानीय खाना महोत्सवका मुख्य केन्द्रबिन्दु हुने आयोजकको भनाई छ ।

पोखराको खहरे चोकदेखि ड्यामसाइडसम्मको तीन किलोमिटर क्षेत्रभित्र संचालन हुने महोत्सवमा निःशुल्क प्रवेशको व्यवस्था गरिएको छ। महोत्सवको प्रवर्द्धन नेपाल पर्यटन बोर्ड गण्डकी प्रदेश र पोखरा महानगरपालिकाले गरेका छन् ।