पोखरा, १ पुस –
कास्कीको प्रमुख जिल्ला अधिकारीबाट सरुवा भई त्रिभुवन अन्तर्राष्ट्रिय विमानस्थल स्थित अध्यागमन कार्यालयमा जिम्मेवारी सम्हाल्न जान लागेका कृष्णवहादुर राउतलाई पश्चिमाञ्चल होटल संघ पोखराले हालै विदाई गरेको छ ।
सो अवसरमा संघका पदाधिकारी तथा सल्लाहकारले अध्यागमन कार्यालय मार्फत देशविदेशमा नेपालको छवि उँचो राख्ने खालको काम गर्न प्रमुख जिल्ला अधिकारी राउतलाई सुझाव दिएका थिए । विमानबाट विदेशी पर्यटक विमानस्थलमा अवतरित हुन साथ त्यहाँको व्यवहार र गतिविधि हेरेर नेपालप्रति आफ्नो धारणा बनाउने स्मरण गराउँदै पर्यटकप्रति गरिने व्यवहारमा सुधार ल्याउन सुझाव दिइएको हो ।
संघका अध्यक्ष भरतराज पराजुलीले विनासकारी भूकम्प र नाकाबन्दी जारी हुँदा पनि प्रजिअ राउतले कास्कीमा कुशलतापूर्वक आफ्नो जिम्मेवारी पूरा गरेको बताउँदै उनको प्रशंशा गरे । राउतको पर्यटनमैत्री भूमिकाले पोखराको पर्यटन माथि लैजान सकारात्मक भूमिका खेलेको पनि अध्यक्ष पराजुलीले बताए । अध्यागमन विभागमा रहँदा विमानस्थलमा केही न केही सुधार ल्याउन राउतले भूमिका खेल्नेमा आफू आसावादी भएको पनि पराजुलीले विश्वास व्यक्त गरे ।
कार्यक्रममा बोल्दै संघका सल्लाहकार एवं नेपाल पर्यटन वोर्डका सदस्य विश्वशंकर पालिखेले अध्यागमनमा आफ्नो जिम्मेवारी निर्वाह गर्दा राउतले धेरै सुधारका काम गर्न सक्ने बताए । नेपालको छवि राम्रो बनाउन अध्यागमन कार्यालयको भूमिका ठूलो हुने भनाई पनि उनको थियो ।
संघका अर्का सल्लाहकार सुन्दरकुमार श्रेष्ठले प्रजिअ राउत युवा र गतिशिल व्यक्तित्व भएका कारण पनि उनीबाट सुधारको अपेक्षा गर्न सकिने बताए । संघका अर्का सल्लाहकार लक्ष्मीवहादुर भट्टराईले कास्कीमा रहँदा राउतले कुशकतापूर्वक आफ्नो जिम्मेवारी निर्वाह गरेको आफूहरुे पाएको बताए । संघका सल्लाहकार बच्चुराम तिवारीले विकास निर्माणका काममा प्रजिअ राउतको सहकार्य मननयोग्य रहेको बताए ।
कार्यक्रममा बोल्दै प्रजिअ राउतले १९ महिने आफ्नो कार्यकालमा आफूले निर्वाह गरेको भूमिकाबाट आफू सन्तुृष्ट भएको बताए । पोखरा क्षेत्रीय अन्तर्राष्ट्रिय विमानस्थलको मुअब्जा वितरण, लुम्ले र भदौरे तमागिमा पहिरो जाँदा आफूले खेलेको जनसहयोगी भूमिका, विनासकारी भूकम्प जाँदा खेलेको समन्वयकारी भूमिका, सडक विस्तार र नाकाबन्दीको समस्यामा जनतालाई पुर्याएको योगदानको प्रजिअ राउतले स्मरण गरे ।
सो अवसरमा टोल विकास वडा समन्वय समितिका संयोजक गिरिराज अधिकारी, संघका प्रथम उपाध्यक्ष विकल तुलाचन र संघका महासचिव भकेन्द्रकुमार श्रेष्ठले पनि आफ्नो भनाई राखेका थिए ।
