पोखरा न्यूज – २३, पुष । दशौ पोखरा महोत्सवलाई सुरक्षित वातावरणमा भब्य र सभ्य तरिकाले सम्पन्न गराउन कास्कीमा रहेका सम्पूर्ण सुरक्षा निकायले सहयोग गर्ने प्रतिबद्धता जनाएका छन । महोत्सव आयोजक युनाइटेड क्लबका पदाधिकारीहरु संगको अन्तरक्रियामा सहभागी कास्कीका सुरक्षा निकायका प्रमुखहरुले पोखरा महोत्सवमा शान्ति सुरक्षा अमन चयन गर्नका लागी कुनै कसुर बाकी नरहने गरी काम गर्ने बताएका हुन ।
अन्तरक्रिया कार्यक्रममा बोल्दै कास्कीका प्रमुख जिल्ला अधिकारी रमेश कुमार केसीले पोखरा महोत्सवलाई सुरक्षित रुपमा सम्पन्न गर्नका लागी सुरक्षा निकायसँग समन्वय गरी महोत्सवलाई भब्य र सभ्य बनाउनतर्फ लाग्ने बताए । प्रमुख जिल्ला अधिकारी केसीले संघ सस्था क्लबहरुले आर्थिक उपार्जन गर्ने गरी मेला महोत्सवहरु आयोजना गरिरहेको बताउदै सामाजिक काममा अगाडि रहेको युनाईटेड क्लबलाई अर्को महोत्सव गर्दा खेरी कम्पनी रजिष्टर्डको कार्यालयमा दर्ता गरी महोत्सब सञ्चालन गर्न समेत केसीले सुझाब दिए ।
त्यस्तै जिल्ला प्रहरी कार्यालय कास्कीका प्रहरी प्रमुख प्रहरी उपरीक्षक दान बहादुर कार्कीले महोत्सवमा सुरक्षा प्रदान गर्नका लागि महोत्सव आयोजक र अन्य सुरक्षा निकायसंग समन्वय गरेर अगाडि बढ्ने बताए । महोत्सवमा विशेष गरी सांझको समयमा भीडभाड हुने भएकाले त्यसलाई मध्यनजर गरी सुरक्षा व्यवस्था मिलाउने र कोही कसैले कानुनले निषेध गर्ने कार्य र समाजमा पाच्य नहुने काम गरे कानुन अनुसार कारबाही गर्ने वताए ।
कालिका गण मालेपाटनका गणपति सशस्त्र प्रहरी उपरीक्षक प्रेम ध्वज शाहले विगतका वर्षहरुमा पनि सशस्त्र प्रहरीले अन्य सुरक्षा निकायसंग सहकार्य गरी महोत्सवलाई सहयोग गर्ने प्रतिबद्धता जनाए । राष्ट्रिय अनुसन्धान कार्यालय कास्कीका प्रमुख अनुसन्धान निर्देशक भुमिराज पाठकलेसमेत महोत्सवको सफलताको कामना गर्दै महोत्सवलाई आफ्नो युनिटले समेत अन्य सुरक्षा निकायसँग सहकार्य गरी शान्ति सुरक्षा अमन चयनमा सहयोग पुर्याउने बताए ।
त्यस्तै वडा प्रहरी कार्यालय राम बजारका प्रमुख प्रहरी निरीक्षक प्रकाश थापाले पोखरा महोत्सव स्थल आफ्नो वडाको मातहतमा पर्ने भएकाले आयोजक संग सहकार्य गरी महोत्सव स्थल र परिसरको सुरक्षामा कुनै कसुर बाकी नरहने गरी काम गर्ने बताए । जिल्ला ट्राफिक प्रहरी कार्यालय कास्की औधोगिक क्षेत्र बिटका प्रमुख प्रहरी नायब निरीक्षक जीतजंग कार्कीले अन्य महोत्सवहरुमा भन्दा पोखरा महोत्सवको ट्राफिक व्यवस्थापन चुस्त दुस्त हुने गरेको बताउदै विगतका वर्षहरुमा जसरी सहज रुपमा सवारी आवागमन हुने गरी ट्राफिक व्यवस्थापन गरिने बताए ।
सो अवसरमा बोल्दै महोत्सव सुरक्षा व्यवस्थापन उपसमितिका संयोजक तथा युनाईटेड क्लबका सचिव सूर्य बहादुर वानियाले महोत्सव स्थलको बारेमा जानकारी दिँदै महोत्सवको सुरक्षालाई मध्येनजर गरी महोत्सवका गतिविधीलाई समेटने गरी सिसी क्यामेरा जडान गरिने, पार्किङको पूर्ण रुपमा व्यवस्थापन गर्ने र सुरक्षा निकायसँग आयोजकले समेत संहकार्य गरी महोत्सवलाई सफल बनाउने प्रतिबद्धता जनाए ।
त्यस्तै जेट सेक्युरिटी कम्पनी प्रालिका सञ्चालक कृष्ण सुवेदीले महोत्सव अवधिभर १५ जना निजी सेक्युरिटी गार्डहरु परिचालन गर्ने र उनीहरुले प्रवेश द्धार, बाहिरी गेट र विशेष गरी रातको समयमा स्टलको सुरक्षा प्रदान गर्ने बताए । त्यस्तै स्वयम सेवक परिचालन उपसमितिका संयोजक विष्णु कुमार गुरुङले महोत्सव अवधिभर ५० जना स्वयंसेवक परिचालन गर्ने र उनीहरुले पनि आयोजक र सुरक्षा निकाय संग समन्वय गरी काम गर्ने बताए ।
ट्राफिक व्यवस्थापन उपसमिती संयोजक राम बहादुर थापा मगरले ट्राफिक संग सहकार्य गरी महोत्सव स्थल बाहिरको ट्राफिक व्यवस्थापन गरिने बताए । महोत्सव आयोजक मुल समारोह समितीका संयोजक तथा युनाइटेड क्लबका अध्यक्ष लालकाजी गुरुङको अध्यक्षतामा सम्पन्न कार्यक्रमको सञ्चालन क्लवका महासचिव तथा महोत्सव प्रचारप्रसार संयोजक शान्त बहादुर थापाले गरेका थिए ।
