पोखरा । पोखरा महानगरपालिकाद्वारा सञ्चालित पाँच क्वारेन्टिनमा १ सय १७ जना रहेको पोखरा महानगर स्वास्थ्य महाशाखाले जनाएको छ ।
महानगरले संचालन गरेका लेकसिटी क्वारेन्टिन ‘व्लक बि’ , पोखरा ५ स्थित कृषी केन्द्र रेशम खेतीको क्वारेन्टिन, पोखरा ५ स्थित बाराही मा.वी., पोखरा २९ लेखनाथ स्थित जनप्रकाश मा.वी. र पोखरा ३० स्थित त्रिभुवन शान्ती मावीमा छिमेकी देश भारत र तराईबाट आएका १ सय १७ जना रहेको महाशाखाले जनाएको हो ।
शुक्रबार लेकसिटी क्वारेन्टिन ‘व्लक बि’ र पोखरा ५ स्थित कृषी केन्द्र रेशम खेतीको क्वारेन्टिनमा ८२ जना पुरुष र १२ जना महिला गरि ९४ जना रहेकोमा क्वारेन्टिनमा रहेको संख्या शनिवार २३ जना थप हुँदै १ सय १७ जना पुगेको छ ।
लेकसिटी क्वारेन्टिन ‘व्लक बि’ ४३ पुरुष र ८ महिला गरि ५१ जना र मालेपाटन कृषी केन्द्रमा ४० जना पुरुष र ६ महिला सहित ४६ जना, वाराही मा.वी. १४ जना पुरुष, जनप्रकाश मा.वी. मा ४ जना पुरुष र त्रिभुवन शान्ती मावीमा २ जना पुरुष रहेको स्वास्थ्य महाशाखाका प्रमुख हेमन्त शर्मा पौडेलले पोखरा न्यूजलाई जानकारी दिए ।
क्वारेन्टिनमा अहिले भारत लगायत नेपालको तराईबाट आएकाहरुलाई राखिएको र उनीहरुको स्वास्थ्य जाँच भइरहेको स्वास्थ्य महाशाखाका निरिक्षक फुलदेव तिम्सिनाले बताए । क्वारेन्टिनमा रहेकाहरुको स्वाव संकलन गरिसकिएको र पिसीआर परीक्षण हुदै गरेको तिम्सिनाले जनाए ।
क्वारेन्टिनमा रहेकाहरुलाई खान, बस्न लगाएत आवश्यक सामाग्रीहरु उपलव्ध गराइएको छ ।
