पोखरा। ‘माया यो कस्तो माया’, ‘दुरी’, ‘म मर्दा रुन बस्नेहरुलाई’, ‘जिवनसंगीनि’ गीतहरुका कारण दर्शक स्रोतामाझ चिनिएका गायक तथा संगीतकार जिवन सुनारले नयाँ गीत दर्शकमाझ पस्केका छन् । ‘बिन्ती सुनिदेउन’ बोलको गीत भिडियो सहित शुक्रबार सार्वजनिक भएको हो । गीतको लागि संगीत सिर्जना सुनारले नै गरेका छन् । गीतको रचना भने नेत्र गुरुङसँग मिलेर गरेका हुन् ।
यो गीतको भिडियोलाई नेत्र गुरुङले निर्देशन गरेका छन् । नेपाली चलचित्र र रंगमञ्चमा स्थापित बनिसकेका कलाकार प्रकाश घिमिरेको जिवन्त अभिनयले भिडियोलाई परिपक्क हुन सघाएको छ । कलाकारहरु प्रमिला तुलाचन, दिपिका क्षेत्री, राजेन्द्र गहतराजसँगै पोखराका विभिन्न क्षेत्रका व्यक्तिहरुको अभिनय हेर्न पाइन्छ । भिडियोलाई आर्कषक बनाउन सबैको उतिकै मेहनत देखिन्छ ।
भिडियोलाई मिलन शंकरले खिचेका हुन् । निर्देशक गुरुङ आफैले सम्पादन गरेको भिडियोलाई किरणराज थापाले रंग सँयोजन गरेका छन् । योगेश काजीको एरेन्ज रहेको गीतको भिडियो निर्माणमा विजयराज अधिकारीले व्यवस्थापनको भुमिका निभाएका छन् ।
कोरोनाको महामारीपछि नेपालमा गरिएको लकडाउनका कारण समाजमा परेको प्रभावलाई एउटा पात्र मार्फत भिडियोमा देखाउन खोजिएको छ । नेत्र इन्टरटेनमेन्ट प्रालिको प्रस्तुतीमा तयार भएको भिडियोलार्ई नेत्र इन्टरटेनमेन्ट प्रालिको अफिसियल युट्युब च्यानलबाट सार्वजनिक गरिएको हो ।